៧. នាគទត្តសុត្តវណ្ណនា

២២៧. សត្តមេ អតិកាលេនាតិ សព្ពរត្តិំ និទ្ទាយិត្វា ពលវបច្ចូសេ កោដិសម្មុញ្ជនិយា ថោកំ សម្មជ្ជិត្វា មុខំ ធោវិត្វា យាគុភិក្ខាយ បាតោវ បវិសតិ. អតិទិវាតិ យាគុំ អាទាយ អាសនសាលំ គន្ត្វា បិវិត្វា ឯកស្មិំ ឋានេ និបន្នោ និទ្ទាយិត្វា – ‘‘មនុស្សានំ ភោជនវេលាយ បណីតំ ភិក្ខំ លភិស្សាមី’’តិ ឧបកដ្ឋេ មជ្ឈន្ហិកេ ឧដ្ឋាយ ធម្មករណេន ឧទកំ គហេត្វា អក្ខីនិ បមជ្ជិត្វា បិណ្ឌាយ ចរិត្វា យាវទត្ថំ ភុញ្ជិត្វា មជ្ឈន្ហិកេ វីតិវត្តេ បដិក្កមតិ. ទិវា ច អាគន្ត្វាតិ អតិកាលេ បវិដ្ឋេន នាម អញ្ញេហិ ភិក្ខូហិ បឋមតរំ អាគន្តព្ពំ ហោតិ, ត្វំ បន អតិវិយ ទិវា អាគន្ត្វា គតាសីតិ អត្ថោ. ភាយាមិ នាគទត្តន្តិ តំ នាគទត្តំ អហំ ភាយាមិ. សុប្បគព្ភន្តិ សុដ្ឋុ បគព្ភំ. កុលេសូតិ ខត្តិយកុលាទិឧបដ្ឋាកកុលេសុ. សត្តមំ.