៧. នវកម្មិកសុត្តវណ្ណនា

២០៣. សត្តមេ នវកម្មិកភារទ្វាជោតិ សោ កិរ អរញ្ញេ រុក្ខំ ឆិន្ទាបេត្វា តត្ថេវ បាសាទកូដាគារាទីនិ យោជេត្វា នគរំ អាហរិត្វា វិក្កិណាតិ, ឥតិ នវកម្មំ និស្សាយ ជីវតីតិ នវកម្មិកោ, គោត្តេន ភារទ្វាជោតិ នវកម្មិកភារទ្វាជោ. ទិស្វានស្ស ឯតទហោសីតិ ឆព្ពណ្ណរស្មិយោ វិស្សជ្ជេត្វា និសិន្នំ ភគវន្តំ ទិស្វាន អស្ស ឯតំ អហោសិ. វនស្មិន្តិ ឥមស្មិំ វនសណ្ឌេ. ឧច្ឆិន្នមូលំ មេ វនន្តិ មយ្ហំ កិលេសវនំ ឧច្ឆិន្នមូលំ. និព្ពនថោតិ និក្កិលេសវនោ. ឯកោ រមេតិ ឯកកោ អភិរមាមិ. អរតិំ វិប្បហាយាតិ បន្តសេនាសនេសុ ចេវ ភាវនាយ ច ឧក្កណ្ឋិតំ ជហិត្វា. សត្តមំ.