៥. មានត្ថទ្ធសុត្តវណ្ណនា

២០១. បញ្ចមេ មានត្ថទ្ធោតិ វាតភរិតភស្តា វិយ មានេន ថទ្ធោ. អាចរិយន្តិ សិប្បុគ្គហណកាលេ អាចរិយោ អនភិវាទេន្តស្ស សិប្បំ ន ទេតិ, អញ្ញស្មិំ បន កាលេ តំ ន អភិវាទេតិ, អត្ថិភាវម្បិស្ស ន ជានាតិ. នាយំ សមណោតិ ឯវំ កិរស្ស អហោសិ – ‘‘យស្មា អយំ សមណោ មាទិសេ ជាតិសម្បន្នព្រាហ្មណេ សម្បត្តេ បដិសន្ថារមត្តម្បិ ន ករោតិ, តស្មា ន កិញ្ចិ ជានាតី’’តិ.

អព្ភុតវិត្តជាតាតិ អភូតបុព្ពាយ តុដ្ឋិយា សមន្នាគតា. កេសុ ចស្សាតិ កេសុ ភវេយ្យ. ក្យស្សាតិ កេ អស្ស បុគ្គលស្ស. អបចិតា អស្សូតិ អបចិតិំ ទស្សេតុំ យុត្តា ភវេយ្យុំ. អរហន្តេតិ ឥមាយ គាថាយ ទេសនាកុសលត្តា អត្តានំ អន្តោកត្វា បូជនេយ្យំ ទស្សេតិ. បញ្ចមំ.