១១. សង្គារវសុត្តវណ្ណនា

២០៧. ឯកាទសមេ បច្ចេតីតិ ឥច្ឆតិ បត្ថេតិ. សាធុ, ភន្តេតិ អាយាចមានោ អាហ. ថេរស្ស កិរេស គិហិសហាយោ, តស្មា ថេរោ ‘‘អយំ វរាកោ មំ សហាយំ លភិត្វាបិ មិច្ឆាទិដ្ឋិំ គហេត្វា មា អបាយបូរកោ អហោសី’’តិ អាយាចតិ. អបិចេស មហាបរិវារោ, តស្មិំ បសន្នេ បញ្ចកុលសតានិ អនុវត្តិស្សន្តីតិ មញ្ញមានោបិ អាយាចតិ. អត្ថវសន្តិ អត្ថានិសំសំ អត្ថការណំ. បាបន្តិ បាណាតិបាតាទិអកុសលំ. បវាហេមីតិ គលប្បមាណំ ឧទកំ ឱតរិត្វា បវាហេមិ បលាបេមិ. ធម្មោតិ គាថា វុត្តត្ថាវ. ឯកាទសមំ.