៤. បតិរូបសុត្តវណ្ណនា

១៥០. ចតុត្ថេ អនុរោធវិរោធេសូតិ រាគបដិឃេសុ. មា សជ្ជិត្ថោ តទាចរន្តិ ឯវំ ធម្មកថំ អាចរន្តោ មា លគ្គិ. ធម្មកថំ កថេន្តស្ស ហិ ឯកច្ចេ សាធុការំ ទទន្តិ, តេសុ រាគោ ឧប្បជ្ជតិ. ឯកច្ចេ អសក្កច្ចំ សុណន្តិ, តេសុ បដិឃោ ឧប្បជ្ជតិ. ឥតិ ធម្មកថិកោ អនុរោធវិរោធេសុ សជ្ជតិ នាម. ត្វំ ឯវំ មា សជ្ជិត្ថោតិ វទតិ. យទញ្ញមនុសាសតីតិ យំ អញ្ញំ អនុសាសតិ, តំ. សម្ពុទ្ធោ ហិតានុកម្បី ហិតេន អនុបកម្បតិ. យស្មា ច ហិតានុកម្បី, តស្មា អនុរោធវិរោធេហិ វិប្បមុត្តោ តថាគតោតិ. ចតុត្ថំ.