២. អយ្យិកាសុត្តវណ្ណនា

១៣៣. ទុតិយេ ជិណ្ណាតិ ជរាជិណ្ណា. វុឌ្ឍាតិ វយោវុឌ្ឍា. មហល្លិកាតិ ជាតិមហល្លិកា. អទ្ធគតាតិ អទ្ធំ ចិរកាលំ អតិក្កន្តា. វយោអនុប្បត្តាតិ បច្ឆិមវយំ សម្បត្តា. បិយា មនាបាតិ រញ្ញោ កិរ មាតរិ មតាយ អយ្យិកា មាតុដ្ឋានេ ឋត្វា បដិជគ្គិ, តេនស្ស អយ្យិកាយ ពលវបេមំ ឧប្បជ្ជិ. តស្មា ឯវមាហ. ហត្ថិរតនេនាតិ សតសហស្សគ្ឃនកោ ហត្ថី សតសហស្សគ្ឃនកេន អលង្ការេន អលង្កតោ ហត្ថិរតនំ នាម. អស្សរតនេបិ ឯសេវ នយោ. គាមវរោបិ សតសហស្សុដ្ឋានកគាមោវ. សព្ពានិ តានិ ភេទនធម្មានីតិ តេសុ ហិ កិញ្ចិ ករិយមានមេវ ភិជ្ជតិ, កិញ្ចិ កតបរិយោសិតំ ចក្កតោ អនបនីតមេវ, កិញ្ចិ អបនេត្វា ភូមិយំ ឋបិតមត្តំ, កិញ្ចិ តតោ បរំ, ឯវមេវ សត្តេសុបិ កោចិ បដិសន្ធិំ គហេត្វា មរតិ, កោចិ មូឡ្ហគព្ភាយ មាតរិ មាតុកុច្ឆិតោ អនិក្ខន្តោវ, កោចិ និក្ខន្តមត្តោ, កោចិ តតោ បរន្តិ. តស្មា ឯវមាហ. ទុតិយំ.

១៣៤. តតិយេ សព្ពំ ឧត្តានមេវ. តតិយំ.