៥. ទុតិយសង្គាមសុត្តវណ្ណនា

១២៦. បញ្ចមេ អព្ភុយ្យាសីតិ បរាជយេ គរហប្បត្តោ ‘‘អារាមំ គន្ត្វា ភិក្ខូនំ កថាសល្លាបំ សុណាថា’’តិ រត្តិភាគេ ពុទ្ធរក្ខិតេន នាម វុឌ្ឍបព្ពជិតេន ធម្មរក្ខិតស្ស វុឌ្ឍបព្ពជិតស្ស ‘‘សចេ រាជា ឥមញ្ច ឧបាយំ កត្វា គច្ឆេយ្យ, បុន ជិនេយ្យា’’តិ វុត្តជយការណំ សុត្វា អភិឧយ្យាសិ.

យាវស្ស ឧបកប្បតីតិ យាវ តស្ស ឧបកប្បតិ សយ្ហំ ហោតិ. យទា ចញ្ញេតិ យទា អញ្ញេ. វិលុម្បន្តីតិ តំ វិលុម្បិត្វា ឋិតបុគ្គលំ វិលុម្បន្តិ. វិលុម្បតីតិ វិលុម្បិយតិ. ឋានំ ហិ មញ្ញតីតិ ‘‘ការណ’’ន្តិ ហិ មញ្ញតិ. យទាតិ យស្មិំ កាលេ. ជេតារំ លភតេ ជយន្តិ ជយន្តោ បុគ្គលោ បច្ឆា ជេតារម្បិ លភតិ. រោសេតារន្តិ ឃដ្ដេតារំ. រោសកោតិ ឃដ្ដកោ. កម្មវិវដ្ដេនាតិ កម្មបរិណាមេន, តស្ស វិលុម្បនកម្មស្ស វិបាកទានេន. សោ វិលុត្តោ វិលុប្បតីតិ សោ វិលុម្បកោ វិលុម្បិយតិ. បញ្ចមំ.