៧. អឌ្ឌករណសុត្តវណ្ណនា

១១៨. សត្តមេ កាមហេតូតិ កាមមូលកំ. កាមនិទានន្តិ កាមបច្ចយា. កាមាធិករណន្តិ កាមការណា. សព្ពានិ ហេតានិ អញ្ញមញ្ញវេវចនានេវ. ភទ្រមុខោតិ សុន្ទរមុខោ. ឯកទិវសំ កិរ រាជា អឌ្ឌករណេ និសីទិ. តត្ថ បឋមតរំ លញ្ជំ គហេត្វា និសិន្នា អមច្ចា អស្សាមិកេបិ សាមិកេ ករិំសុ. រាជា តំ ញត្វា – ‘‘មយ្ហំ តាវ បថវិស្សរស្ស សម្មុខាបេតេ ឯវំ ករោន្តិ, បរម្មុខា កិំ នាម ន ករិស្សន្តិ? បញ្ញាយិស្សតិ ទានិ វិដដូភោ សេនាបតិ សកេន រជ្ជេន, កិំ មយ្ហំ ឯវរូបេហិ លញ្ជខាទកេហិ មុសាវាទីហិ សទ្ធិំ ឯកដ្ឋានេ និសជ្ជាយា’’តិ ចិន្តេសិ. តស្មា ឯវមាហ. ខិប្បំវ ឱឌ្ឌិតន្តិ កុមិនំ វិយ ឱឌ្ឌិតំ. យថា មច្ឆា ឱឌ្ឌិតំ កុមិនំ បវិសន្តា ន ជានន្តិ, ឯវំ សត្តា កិលេសកាមេន វត្ថុកាមំ វីតិក្កមន្តា ន ជានន្តីតិ អត្ថោ. សត្តមំ.