៤. អច្ចយសុត្តវណ្ណនា

២៧០. ចតុត្ថេ សម្បយោជេសុន្តិ កលហំ អកំសុ. អច្ចសរាតិ អតិក្កមិ, ឯកោ ភិក្ខុ ឯកំ ភិក្ខុំ អតិក្កម្ម វចនំ អវោចាតិ អត្ថោ. យថាធម្មំ នប្បដិគ្គណ្ហាតីតិ ន ខមតិ. កោធោ វោ វសមាយាតូតិ កោធោ តុម្ហាកំ វសំ អាគច្ឆតុ, មា តុម្ហេ កោធវសំ គមិត្ថាតិ ទីបេតិ. មា ច មិត្តេ ហិ វោ ជរាតិ ឯត្ថ ហីតិ និបាតមត្តំ, តុម្ហាកំ មិត្តធម្មេ ជរា នាម មា និព្ពត្តិ. ភុម្មត្ថេ វា ករណវចនំ, មិត្តេសុ វោ ជរា មា និព្ពត្តិ, មិត្តភាវតោ អញ្ញថាភាវោ មា ហោតូតិ អត្ថោ. អគរហិយំ មា គរហិត្ថាតិ អគារយ្ហំ ខីណាសវបុគ្គលំ មា គរហិត្ថ. ចតុត្ថំ.