៣. សម្ពរិមាយាសុត្តវណ្ណនា

២៦៩. តតិយេ អាពាធិកោតិ ឥសិគណេន អភិសបកាលេ ឧប្បន្នាពាធេន អាពាធិកោ. វាចេហិ មន្តិ សចេ មំ សម្ពរិមាយំ វាចេសិ, ឯវមហំ តម្បិ តិកិច្ឆិស្សាមីតិ វទតិ. មា ខោ ត្វំ, មារិស, វាចេសីតិ វិនាបិ តាវ សម្ពរិមាយំ សក្កោ អម្ហេ ពាធតិ, យទិ បន តំ ជានិស្សតិ, នដ្ឋា មយំ, មា អត្តនោ ឯកស្ស អត្ថាយ អម្ហេ នាសេហីតិ វត្វា និវារយិំសុ. សម្ពរោវ សតំ សមន្តិ យថា សម្ពរោ អសុរិន្ទោ មាយាវី មាយំ បយោជេត្វា វស្សសតំ និរយេ បក្កោ, ឯវំ បច្ចតិ. តុម្ហេ ធម្មិកាវ, អលំ វោ មាយាយាតិ វទតិ. កិំ បន សក្កោ តស្ស កោធំ តិកិច្ឆិតុំ សក្កុណេយ្យាតិ? អាម សក្កុណេយ្យ. កថំ? តទា កិរ សោ ឥសិគណោ ធរតិយេវ, តស្មា នំ ឥសីនំ សន្តិកំ នេត្វា ខមាបេយ្យ, ឯវមស្ស ផាសុ ភវេយ្យ. តេន បន វញ្ចិតត្តា តថា អកត្វា បក្កន្តោវ. តតិយំ.