១០. លោកសុត្តវណ្ណនា

៧០. ទសមេ កិស្មិំ លោកោ សមុប្បន្នោតិ កិស្មិំ ឧប្បន្នេ លោកោ ឧប្បន្នោតិ បុច្ឆតិ. ឆសូតិ ឆសុ អជ្ឈត្តិកេសុ អាយតនេសុ ឧប្បន្នេសុ ឧប្បន្នោតិ វុច្ចតិ. ឆសុ កុព្ពតីតិ តេសុយេវ ឆសុ សន្ថវំ ករោតិ. ឧបាទាយាតិ តានិយេវ ច ឧបាទាយ អាគម្ម បដិច្ច បវត្តតិ. វិហញ្ញតីតិ តេសុយេវ ឆសុ វិហញ្ញតិ បីឡិយតិ. ឥតិ អជ្ឈត្តិកាយតនវសេន អយំ បញ្ហោ អាគតោ, អជ្ឈត្តិកពាហិរានំ បន វសេន អាហរិតុំ វដ្ដតិ. ឆសុ ហិ អជ្ឈត្តិកាយតនេសុ ឧប្បន្នេសុ អយំ ឧប្បន្នោ នាម ហោតិ, ឆសុ ពាហិរេសុ សន្ថវំ ករោតិ, ឆន្នំ អជ្ឈត្តិកានំ ឧបាទាយ ឆសុ ពាហិរេសុ វិហញ្ញតីតិ. ទសមំ.

អទ្ធវគ្គោ សត្តមោ.