៧. អទ្ធវគ្គោ

១. នាមសុត្តវណ្ណនា

៦១. អទ្ធវគ្គស្ស បឋមេ នាមំ សព្ពំ អទ្ធភវីតិ នាមំ សព្ពំ អភិភវតិ អនុបតតិ. ឱបបាតិកេន វា ហិ កិត្តិមេន វា នាមេន មុត្តោ សត្តោ វា សង្ខារោ វា នត្ថិ. យស្សបិ ហិ រុក្ខស្ស វា បាសាណស្ស វា ‘‘ឥទំ នាម នាម’’ន្តិ ន ជានន្តិ, អនាមកោត្វេវ តស្ស នាមំ ហោតិ. បឋមំ.

២-៣. ចិត្តសុត្តាទិវណ្ណនា

៦២. ទុតិយេ សព្ពេវ វសមន្វគូតិ យេ ចិត្តស្ស វសំ គច្ឆន្តិ, តេសំយេវ អនវសេសបរិយាទានមេតំ. ទុតិយំ.

៦៣. តតិយេបិ ឯសេវ នយោ. តតិយំ.

៤-៥. សំយោជនសុត្តាទិវណ្ណនា

៦៤. ចតុត្ថេ កិំ សុ សំយោជនោតិ កិំ សំយោជនោ កិំ ពន្ធនោ? វិចារណន្តិ វិចរណា បាទានិ. ពហុវចនេ ឯកវចនំ កតំ. វិតក្កស្ស វិចារណន្តិ វិតក្កោ តស្ស បាទា. ចតុត្ថំ.

៦៥. បញ្ចមេបិ ឯសេវ នយោ. បញ្ចមំ.

៦. អត្តហតសុត្តវណ្ណនា

៦៦. ឆដ្ឋេ កេនស្សុព្ភាហតោតិ កេន អព្ភាហតោ. សុ-ការោ និបាតមត្តំ. ឥច្ឆាធូបាយិតោតិ ឥច្ឆាយ អាទិត្តោ. ឆដ្ឋំ.

៧-៩. ឧឌ្ឌិតសុត្តាទិវណ្ណនា

៦៧. សត្តមេ តណ្ហាយ ឧឌ្ឌិតោតិ តណ្ហាយ ឧល្លង្ឃិតោ. ចក្ខុញ្ហិ តណ្ហារជ្ជុនា អាវុនិត្វា រូបនាគទន្តេ ឧឌ្ឌិតំ, សោតាទីនិ សទ្ទាទីសូតិ តណ្ហាយ ឧឌ្ឌិតោ លោកោ. មច្ចុនា បិហិតោតិ អនន្តរេ អត្តភាវេ កតំ កម្មំ ន ទូរំ ឯកចិត្តន្តរំ, ពលវតិយា បន មារណន្តិកវេទនាយ បព្ពតេន វិយ ឱត្ថដត្តា សត្តា តំ ន ពុជ្ឈន្តីតិ ‘‘មច្ចុនា បិហិតោ លោកោ’’តិ វុត្តំ. សត្តមំ.

៦៨. អដ្ឋមេ ស្វេវ បញ្ហោ ទេវតាយ ហេដ្ឋុបរិយាយវសេន បុច្ឆិតោ. អដ្ឋមំ.

៦៩. នវមេ សព្ពំ ឧត្តានមេវ. នវមំ.

១០. លោកសុត្តវណ្ណនា

៧០. ទសមេ កិស្មិំ លោកោ សមុប្បន្នោតិ កិស្មិំ ឧប្បន្នេ លោកោ ឧប្បន្នោតិ បុច្ឆតិ. ឆសូតិ ឆសុ អជ្ឈត្តិកេសុ អាយតនេសុ ឧប្បន្នេសុ ឧប្បន្នោតិ វុច្ចតិ. ឆសុ កុព្ពតីតិ តេសុយេវ ឆសុ សន្ថវំ ករោតិ. ឧបាទាយាតិ តានិយេវ ច ឧបាទាយ អាគម្ម បដិច្ច បវត្តតិ. វិហញ្ញតីតិ តេសុយេវ ឆសុ វិហញ្ញតិ បីឡិយតិ. ឥតិ អជ្ឈត្តិកាយតនវសេន អយំ បញ្ហោ អាគតោ, អជ្ឈត្តិកពាហិរានំ បន វសេន អាហរិតុំ វដ្ដតិ. ឆសុ ហិ អជ្ឈត្តិកាយតនេសុ ឧប្បន្នេសុ អយំ ឧប្បន្នោ នាម ហោតិ, ឆសុ ពាហិរេសុ សន្ថវំ ករោតិ, ឆន្នំ អជ្ឈត្តិកានំ ឧបាទាយ ឆសុ ពាហិរេសុ វិហញ្ញតីតិ. ទសមំ.

អទ្ធវគ្គោ សត្តមោ.