២. ផុសតិសុត្តវណ្ណនា

២២. ទុតិយេ នាផុសន្តំ ផុសតីតិ កម្មំ អផុសន្តំ វិបាកោ ន ផុសតិ, កម្មមេវ វា អផុសន្តំ កម្មំ ន ផុសតិ. កម្មញ្ហិ នាករោតោ ករិយតិ. ផុសន្តញ្ច តតោ ផុសេតិ កម្មំ ផុសន្តំ វិបាកោ ផុសតិ, កម្មមេវ វា ផុសតិ. កម្មញ្ហិ ករោតោ ករិយតិ. តស្មា ផុសន្តំ ផុសតិ, អប្បទុដ្ឋបទោសិនន្តិ យស្មា ន អផុសន្តំ ផុសតិ, ផុសន្តញ្ច ផុសតិ, អយំ កម្មវិបាកានំ ធម្មតា, តស្មា យោ ‘‘អប្បទុដ្ឋស្ស នរស្ស ទុស្សតិ, សុទ្ធស្ស បោសស្ស អនង្គណស្សា’’តិ ឯវំ វុត្តោ អប្បទុដ្ឋបទោសី បុគ្គលោ, តំ បុគ្គលំ កម្មំ ផុសន្តមេវ កម្មំ ផុសតិ, វិបាកោ វា ផុសតិ. សោ ហិ បរស្ស ឧបឃាតំ កាតុំ សក្កោតិ វា មា វា, អត្តា បនានេន ចតូសុ អបាយេសុ ឋបិតោ នាម ហោតិ. តេនាហ ភគវា – ‘‘តមេវ ពាលំ បច្ចេតិ បាបំ, សុខុមោ រជោ បដិវាតំវ ខិត្តោ’’តិ. ទុតិយំ.