៣. បុណ្ណោវាទសុត្តវណ្ណនា

៣៩៥. ឯវំ មេ សុតន្តិ បុណ្ណោវាទសុត្តំ. តត្ថ បដិសល្លានាតិ ឯកីភាវា. តំ ចេតិ តំ ចក្ខុញ្ចេវ រូបញ្ច. នន្ទីសមុទយា ទុក្ខសមុទយោតិ នន្ទិយា តណ្ហាយ សមោធានេន បញ្ចក្ខន្ធទុក្ខស្ស សមោធានំ ហោតិ. ឥតិ ឆសុ ទ្វារេសុ ទុក្ខំ សមុទយោតិ ទ្វិន្នំ សច្ចានំ វសេន វដ្ដំ មត្ថកំ បាបេត្វា ទស្សេសិ. ទុតិយនយេ និរោធោ មគ្គោតិ ទ្វិន្នំ សច្ចានំ វសេន វិវដ្ដំ មត្ថកំ បាបេត្វា ទស្សេសិ. ឥមិនា ច ត្វំ បុណ្ណាតិ បាដិយេក្កោ អនុសន្ធិ. ឯវំ តាវ វដ្ដវិវដ្ដវសេន ទេសនំ អរហត្តេ បក្ខិបិត្វា ឥទានិ បុណ្ណត្ថេរំ សត្តសុ ឋានេសុ សីហនាទំ នទាបេតុំ ឥមិនា ច ត្វន្តិអាទិមាហ.

៣៩៦. ចណ្ឌាតិ ទុដ្ឋា កិព្ពិសា. ផរុសាតិ កក្ខឡា. អក្កោសិស្សន្តីតិ ទសហិ អក្កោសវត្ថូហិ អក្កោសិស្សន្តិ. បរិភាសិស្សន្តីតិ កិំ សមណោ នាម ត្វំ, ឥទញ្ច ឥទញ្ច តេ ករិស្សាមាតិ តជ្ជេស្សន្តិ. ឯវមេត្ថាតិ ឯវំ មយ្ហំ ឯត្ថ ភវិស្សតិ.

ទណ្ឌេនាតិ ចតុហត្ថេន ទណ្ឌេន វា ឃដិកមុគ្គរេន វា. សត្ថេនាតិ ឯកតោធារាទិនា. សត្ថហារកំ បរិយេសន្តីតិ ជីវិតហារកំ សត្ថំ បរិយេសន្តិ. ឥទំ ថេរោ តតិយបារាជិកវត្ថុស្មិំ អសុភកថំ សុត្វា អត្តភាវេន ជិគុច្ឆន្តានំ ភិក្ខូនំ សត្ថហារកបរិយេសនំ សន្ធាយាហ. ទមូបសមេនាតិ ឯត្ថ ទមោតិ ឥន្ទ្រិយសំវរាទីនំ ឯតំ នាមំ. ‘‘សច្ចេន ទន្តោ ទមសា ឧបេតោ, វេទន្តគូ វុសិតព្រហ្មចរិយោ’’តិ (សំ. និ. ១.១៩៥; សុ. និ. ៤៦៧) ឯត្ថ ហិ ឥន្ទ្រិយសំវរោ ទមោតិ វុត្តោ. ‘‘យទិ សច្ចា ទមា ចាគា, ខន្ត្យា ភិយ្យោធ វិជ្ជតី’’តិ (សំ. និ. ១.២៤៦; សុ. និ. ១៩១) ឯត្ថ បញ្ញា ទមោតិ វុត្តោ. ‘‘ទានេន ទមេន សំយមេន សច្ចវជ្ជេនា’’តិ (ទី. និ. ១.១៦៦; ម. និ. ២.២២៦) ឯត្ថ ឧបោសថកម្មំ ទមោតិ វុត្តំ. ឥមស្មិំ បន សុត្តេ ខន្តិ ទមោតិ វេទិតព្ពា. ឧបសមោតិ តស្សេវ វេវចនំ.

៣៩៧. អថ ខោ អាយស្មា បុណ្ណោតិ កោ បនេស បុណ្ណោ, កស្មា បនេត្ថ គន្តុកាមោ អហោសីតិ. សុនាបរន្តវាសិកោ ឯវ ឯសោ, សាវត្ថិយំ បន អសប្បាយវិហារំ សល្លក្ខេត្វា តត្ថ គន្តុកាមោ អហោសិ.

តត្រាយំ អនុបុព្ពិកថា – សុនាបរន្តរដ្ឋេ កិរ ឯកស្មិំ វាណិជកគាមេ ឯតេ ទ្វេ ភាតរោ. តេសុ កទាចិ ជេដ្ឋោ បញ្ច សកដសតានិ គហេត្វា ជនបទំ គន្ត្វា ភណ្ឌំ អាហរតិ, កទាចិ កនិដ្ឋោ. ឥមស្មិំ បន សមយេ កនិដ្ឋំ ឃរេ ឋបេត្វា ជេដ្ឋភាតិកោ បញ្ច សកដសតានិ គហេត្វា ជនបទចារិកំ ចរន្តោ អនុបុព្ពេន សាវត្ថិំ បត្វា ជេតវនស្ស នាតិទូរេ សកដសត្ថំ និវាសេត្វា ភុត្តបាតរាសោ បរិជនបរិវុតោ ផាសុកដ្ឋានេ និសីទិ.

តេន ច សមយេន សាវត្ថិវាសិនោ ភុត្តបាតរាសា ឧបោសថង្គានិ អធិដ្ឋាយ សុទ្ធុត្តរាសង្គា គន្ធបុប្ផាទិហត្ថា យេន ពុទ្ធោ យេន ធម្មោ យេន សង្ឃោ, តន្និន្នា តប្បោណា តប្បាព្ភារា ហុត្វា ទក្ខិណទ្វារេន និក្ខមិត្វា ជេតវនំ គច្ឆន្តិ. សោ តេ ទិស្វា ‘‘កហំ ឥមេ គច្ឆន្តិ’’តិ ឯកមនុស្សំ បុច្ឆិ. កិំ ត្វំ អយ្យោ ន ជានាសិ, លោកេ ពុទ្ធធម្មសង្ឃរតនានិ នាម ឧប្បន្នានិ, ឥច្ចេស មហាជនោ សត្ថុ សន្តិកេ ធម្មកថំ សោតុំ គច្ឆតីតិ. តស្ស ពុទ្ធោតិ វចនំ ឆវិចម្មាទីនិ ឆិន្ទិត្វា អដ្ឋិមិញ្ជំ អាហច្ច អដ្ឋាសិ. អថ អត្តនោ បរិជនបរិវុតោ តាយ បរិសាយ សទ្ធិំ វិហារំ គន្ត្វា សត្ថុ មធុរស្សរេន ធម្មំ ទេសេន្តស្ស បរិសបរិយន្តេ ឋិតោ ធម្មំ សុត្វា បព្ពជ្ជាយ ចិត្តំ ឧប្បាទេសិ. អថ តថាគតេន កាលំ វិទិត្វា បរិសាយ ឧយ្យោជិតាយ សត្ថារំ ឧបសង្កមិត្វា វន្ទិត្វា ស្វាតនាយ និមន្តេត្វា ទុតិយទិវសេ មណ្ឌបំ ការេត្វា អាសនានិ បញ្ញបេត្វា ពុទ្ធប្បមុខស្ស សង្ឃស្ស មហាទានំ ទត្វា ភុត្តបាតរាសោ ឧបោសថង្គានិ អធិដ្ឋាយ ភណ្ឌាគារិកំ បក្កោសាបេត្វា, ឯត្តកំ ភណ្ឌំ វិស្សជ្ជិតំ, ឯត្តកំ ន វិស្សជ្ជិតន្តិ សព្ពំ អាចិក្ខិត្វា – ‘‘ឥមំ សាបតេយ្យំ មយ្ហំ កនិដ្ឋស្ស ទេហី’’តិ សព្ពំ និយ្យាតេត្វា សត្ថុ សន្តិកេ បព្ពជិត្វា កម្មដ្ឋានបរាយណោ អហោសិ.

អថស្ស កម្មដ្ឋានំ មនសិករោន្តស្ស កម្មដ្ឋានំ ន ឧបដ្ឋាតិ. តតោ ចិន្តេសិ – ‘‘អយំ ជនបទោ មយ្ហំ អសប្បាយោ, យំនូនាហំ សត្ថុ សន្តិកេ កម្មដ្ឋានំ គហេត្វា សកដ្ឋានមេវ គច្ឆេយ្យ’’ន្តិ. អថ បុព្ពណ្ហសមយេ បិណ្ឌាយ ចរិត្វា សាយន្ហសមយេ បដិសល្លានា វុដ្ឋហិត្វា ភគវន្តំ ឧបសង្កមិត្វា កម្មដ្ឋានំ កថាបេត្វា សត្ត សីហនាទេ នទិត្វា បក្កាមិ. តេន វុត្តំ – ‘‘អថ ខោ អាយស្មា បុណ្ណោ…បេ… វិហរតី’’តិ.

កត្ថ បនាយំ វិហាសីតិ? ចតូសុ ឋានេសុ វិហាសិ, សុនាបរន្តរដ្ឋំ តាវ បវិសិត្វា អជ្ជុហត្ថបព្ពតេ នាម បវិសិត្វា វាណិជគាមំ បិណ្ឌាយ បាវិសិ. អថ នំ កនិដ្ឋភាតា សញ្ជានិត្វា ភិក្ខំ ទត្វា, ‘‘ភន្តេ, អញ្ញត្ថ អគន្ត្វា ឥធេវ វសថា’’តិ បដិញ្ញំ ការេត្វា តត្ថេវ វសាបេសិ.

តតោ សមុទ្ទគិរិវិហារំ នាម អគមាសិ. តត្ថ អយកន្តបាសាណេហិ បរិច្ឆិន្ទិត្វា កតចង្កមោ អត្ថិ, តំ កោចិ ចង្កមិតុំ សមត្ថោ នាម នត្ថិ. តត្ថ សមុទ្ទវីចិយោ អាគន្ត្វា អយកន្តបាសាណេសុ បហរិត្វា មហាសទ្ទំ ករោន្តិ. ថេរោនំ – ‘‘កម្មដ្ឋានំ មនសិករោន្តានំ ផាសុវិហារោ ហោតូ’’តិ សមុទ្ទំ និស្សទ្ទំ កត្វា អធិដ្ឋាសិ.

តតោ មាតុលគិរិំ នាម អគមាសិ. តត្ថ សកុណសង្ឃោ ឧស្សន្នោ, រត្តិញ្ច ទិវា ច សទ្ទោ ឯកាពទ្ធោវ ហោតិ, ថេរោ ឥមំ ឋានំ អផាសុកន្តិ តតោ មកុលការាមវិហារំ នាម គតោ. សោ វាណិជគាមស្ស នាតិទូរោ នច្ចាសន្នោ គមនាគមនសម្បន្នោ វិវិត្តោ អប្បសទ្ទោ. ថេរោ ឥមំ ឋានំ ផាសុកន្តិ តត្ថ រត្តិដ្ឋានទិវាដ្ឋានចង្កមនាទីនិ ការេត្វា វស្សំ ឧបគច្ឆិ. ឯវំ ចតូសុ ឋានេសុ វិហាសិ.

អថេកទិវសំ តស្មិំយេវ អន្តោវស្សេ បញ្ច វាណិជសតានិ បរសមុទ្ទំ គច្ឆាមាតិ នាវាយ ភណ្ឌំ បក្ខិបិំសុ. នាវារោហនទិវសេ ថេរស្ស កនិដ្ឋភាតា ថេរំ ភោជេត្វា ថេរស្ស សន្តិកេ សិក្ខាបទានិ គហេត្វា វន្ទិត្វា គច្ឆន្តោ, – ‘‘ភន្តេ, មហាសមុទ្ទោ នាម អប្បមេយ្យោ អនេកន្តរាយោ, អម្ហេ អាវជ្ជេយ្យាថា’’តិ វត្វា នាវំ អារុហិ. នាវា ឧត្តមជវេន គច្ឆមានា អញ្ញតរំ ទីបកំ បាបុណិ. មនុស្សា បាតរាសំ ករិស្សាមាតិ ទីបកេ ឱតិណ្ណា. តស្មិំ ទីបេ អញ្ញំ កិញ្ចិ នត្ថិ, ចន្ទនវនមេវ អហោសិ.

អថេកោ វាសិយា រុក្ខំ អាកោដេត្វា លោហិតចន្ទនភាវំ ញត្វា អាហ – ‘‘ភោ មយំ លាភត្ថាយ បរសមុទ្ទំ គច្ឆាម, ឥតោ ច ឧត្តរិ លាភោ នាម នត្ថិ, ចតុរង្គុលមត្តា ឃដិកា សតសហស្សំ អគ្ឃតិ, ហារេតព្ពកយុត្តំ ភណ្ឌំ ហារេត្វា ចន្ទនស្ស បូរេមា’’តិ. តេ តថា ករិំសុ. ចន្ទនវនេ អធិវត្ថា អមនុស្សា កុជ្ឈិត្វា – ‘‘ឥមេហិ អម្ហាកំ ចន្ទនវនំ នាសិតំ, ឃាតេស្សាម នេ’’តិ ចិន្តេត្វា – ‘‘ឥធេវ ឃាតិតេសុ សព្ពំ វនំ ឯកំ កុណបំ ភវិស្សតិ, សមុទ្ទមជ្ឈេ នេសំ នាវំ ឱសីទេស្សាមា’’តិ អាហំសុ. អថ តេសំ នាវំ អារុយ្ហ មុហុត្តំ គតកាលេយេវ ឧប្បាទិកំ ឧដ្ឋបេត្វា សយម្បិ តេ អមនុស្សា ភយានកានិ រូបានិ ទស្សយិំសុ. ភីតា មនុស្សា អត្តនោ អត្តនោ ទេវតា នមស្សន្តិ. ថេរស្ស កនិដ្ឋោ ចូឡបុណ្ណកុដុម្ពិកោ – ‘‘មយ្ហំ ភាតា អវស្សយោ ហោតូ’’តិ ថេរស្ស នមស្សមានោ អដ្ឋាសិ.

ថេរោបិ កិរ តស្មិំយេវ ខណេ អាវជ្ជិត្វា តេសំ ព្យសនុប្បត្តិំ ញត្វា វេហាសំ ឧប្បតិត្វា សម្មុខេ អដ្ឋាសិ. អមនុស្សា ថេរំ ទិស្វា ‘‘អយ្យោ បុណ្ណត្ថេរោ ឯតី’’តិ បក្កមិំសុ, ឧប្បាទិកំ សន្និសីទិ. ថេរោ មា ភាយថាតិ តេ អស្សាសេត្វា ‘‘កហំ គន្តុកាមត្ថា’’តិ បុច្ឆិ. ភន្តេ, អម្ហាកំ សកដ្ឋានមេវ គច្ឆាមាតិ. ថេរោ នាវំ ផលេ អក្កមិត្វា ‘‘ឯតេសំ ឥច្ឆិតដ្ឋានំ គច្ឆតូ’’តិ អធិដ្ឋាសិ. វាណិជា សកដ្ឋានំ គន្ត្វា តំ បវត្តិំ បុត្តទារស្ស អារោចេត្វា ‘‘ឯថ ថេរំ សរណំ គច្ឆាមា’’តិ បញ្ចសតា អត្តនោ បញ្ចមាតុគាមសតេហិ សទ្ធិំ តីសុ សរណេសុ បតិដ្ឋាយ ឧបាសកត្តំ បដិវេទេសុំ. តតោ នាវាយ ភណ្ឌំ ឱតារេត្វា ថេរស្ស ឯកំ កោដ្ឋាសំ កត្វា – ‘‘អយំ, ភន្តេ, តុម្ហាកំ កោដ្ឋាសោ’’តិ អាហំសុ. ថេរោ – ‘‘មយ្ហំ វិសុំ កោដ្ឋាសកិច្ចំ នត្ថិ, សត្ថា បន តុម្ហេហិ ទិដ្ឋបុព្ពោ’’តិ. ន ទិដ្ឋបុព្ពោ, ភន្តេតិ. តេន ហិ ឥមិនា សត្ថុ មណ្ឌលមាឡំ ករោថ, ឯវំ សត្ថារំ បស្សិស្សថាតិ. តេ សាធុ, ភន្តេតិ តេន ច កោដ្ឋាសេន អត្តនោ ច កោដ្ឋាសេហិ មណ្ឌលមាឡំ កាតុំ អារភិំសុ.

សត្ថាបិ កិរ អារទ្ធកាលតោ បដ្ឋាយ បរិភោគំ អកាសិ. អារក្ខមនុស្សា រត្តិំ ឱភាសំ ទិស្វា ‘‘មហេសក្ខា ទេវតា អត្ថី’’តិ សញ្ញំ ករិំសុ. ឧបាសកា មណ្ឌលមាឡញ្ច ភិក្ខុសង្ឃស្ស ច សេនាសនានិ និដ្ឋបេត្វា ទានសម្ភារំ សជ្ជេត្វា – ‘‘កតំ, ភន្តេ, អម្ហេហិ អត្តនោ កិច្ចំ, សត្ថារំ បក្កោសថា’’តិ ថេរស្ស អារោចេសុំ. ថេរោ សាយន្ហសមយេ ឥទ្ធិយា សាវត្ថិំ បត្វា, ‘‘ភន្តេ, វាណិជគាមវាសិនោ តុម្ហេ ទដ្ឋុកាមា, តេសំ អនុកម្បំ ករោថា’’តិ ភគវន្តំ យាចិ. ភគវា អធិវាសេសិ. ថេរោ ភគវតោ អធិវាសនំ វិទិត្វា សកដ្ឋានមេវ បច្ចាគតោ.

ភគវាបិ អានន្ទថេរំ អាមន្តេសិ, – ‘‘អានន្ទ, ស្វេ សុនាបរន្តេ វាណិជគាមេ បិណ្ឌាយ ចរិស្សាម, ត្វំ ឯកូនបញ្ចសតានំ ភិក្ខូនំ សលាកំ ទេហី’’តិ. ថេរោ សាធុ, ភន្តេតិ ភិក្ខុសង្ឃស្ស តមត្ថំ អារោចេត្វា នភចារិកា ភិក្ខូ សលាកំ គណ្ហន្តូតិ អាហ. តំទិវសំ កុណ្ឌធានត្ថេរោ បឋមំ សលាកំ អគ្គហេសិ. វាណិជគាមវាសិនោបិ ‘‘ស្វេ កិរ សត្ថា អាគមិស្សតី’’តិ គាមមជ្ឈេ មណ្ឌបំ កត្វា ទានគ្គំ សជ្ជយិំសុ. ភគវា បាតោវ សរីរបដិជគ្គនំ កត្វា គន្ធកុដិំ បវិសិត្វា ផលសមាបត្តិំ អប្បេត្វា និសីទិ. សក្កស្ស បណ្ឌុកម្ពលសិលាសនំ ឧណ្ហំ អហោសិ. សោ កិំ ឥទន្តិ អាវជ្ជេត្វា សត្ថុ សុនាបរន្តគមនំ ទិស្វា វិស្សកម្មំ អាមន្តេសិ – ‘‘តាត អជ្ជ ភគវា តិមត្តានិ យោជនសតានិ បិណ្ឌាចារំ ករិស្សតិ, បញ្ច កូដាគារសតានិ មាបេត្វា ជេតវនទ្វារកោដ្ឋមត្ថកេ គមនសជ្ជានិ កត្វា ឋបេហី’’តិ. សោ តថា អកាសិ. ភគវតោ កូដាគារំ ចតុមុខំ អហោសិ, ទ្វិន្នំ អគ្គសាវកានំ ទ្វិមុខានិ, សេសានិ ឯកមុខានិ. សត្ថា គន្ធកុដិតោ និក្ខម្ម បដិបាដិយា ឋបិតកូដាគារេសុ ធុរកូដាគារំ បាវិសិ. ទ្វេ អគ្គសាវកេ អាទិំ កត្វា ឯកូនបញ្ចភិក្ខុសតានិបិ កូដាគារំ គន្ត្វា និសិន្នា អហេសុំ. ឯកំ តុច្ឆកូដាគារំ អហោសិ, បញ្ចបិ កូដាគារសតានិ អាកាសេ ឧប្បតិំសុ.

សត្ថា សច្ចពន្ធបព្ពតំ នាម បត្វា កូដាគារំ អាកាសេ ឋបេសិ. តស្មិំ បព្ពតេ សច្ចពន្ធោ នាម មិច្ឆាទិដ្ឋិកតាបសោ មហាជនំ មិច្ឆាទិដ្ឋិំ ឧគ្គណ្ហាបេន្តោ លាភគ្គយសគ្គប្បត្តោ ហុត្វា វសតិ. អព្ភន្តរេ ចស្ស អន្តោចាដិយំ បទីបោ វិយ អរហត្តស្ស ឧបនិស្សយោ ជលតិ. តំ ទិស្វា ធម្មមស្ស កថេស្សាមីតិ គន្ត្វា ធម្មំ ទេសេសិ. តាបសោ ទេសនាបរិយោសានេ អរហត្តំ បាបុណិ, មគ្គេនេវាស្ស អភិញ្ញា អាគតា. ឯហិភិក្ខុ ហុត្វា ឥទ្ធិមយបត្តចីវរធរោ ហុត្វា កូដាគារំ បាវិសិ.

ភគវា កូដាគារគតេហិ បញ្ចហិ ភិក្ខុសតេហិ សទ្ធិំ វាណិជគាមំ គន្ត្វា កូដាគារានិ អទិស្សមានានិ កត្វា វាណិជគាមំ បាវិសិ. វាណិជា ពុទ្ធប្បមុខស្ស ភិក្ខុសង្ឃស្ស មហាទានំ ទត្វា សត្ថារំ មកុលការាមំ នយិំសុ. សត្ថា មណ្ឌលមាឡំ បាវិសិ. មហាជនោ យាវ សត្ថា ភត្តទរថំ បដិបស្សម្ភេតិ, តាវ បាតរាសំ កត្វា ឧបោសថង្គានិ សមាទាយ ពហុំ គន្ធញ្ច បុប្ផញ្ច អាទាយ ធម្មស្សវនត្ថាយ អារាមំ បច្ចាគមាសិ. សត្ថា ធម្មំ ទេសេសិ. មហាជនស្ស ពន្ធនមោក្ខោ ជាតោ, មហន្តំ ពុទ្ធកោលាហលំ អហោសិ.

សត្ថា មហាជនស្ស សង្គហត្ថំ កតិបាហំ តត្ថេវ វសិ, អរុណំ បន មហាគន្ធកុដិយំយេវ ឧដ្ឋបេសិ. តត្ថ កតិបាហំ វសិត្វា វាណិជគាមេ បិណ្ឌាយ ចរិត្វា ‘‘ត្វំ ឥធេវ វសាហី’’តិ បុណ្ណត្ថេរំ និវត្តេត្វា អន្តរេ នម្មទានទី នាម អត្ថិ, តស្សា តីរំ អគមាសិ. នម្មទានាគរាជា សត្ថុ បច្ចុគ្គមនំ កត្វា នាគភវនំ បវេសេត្វា តិណ្ណំ រតនានំ សក្ការំ អកាសិ. សត្ថា តស្ស ធម្មំ កថេត្វា នាគភវនា និក្ខមិ. សោ – ‘‘មយ្ហំ, ភន្តេ, បរិចរិតព្ពំ ទេថា’’តិ យាចិ, ភគវា នម្មទានទីតីរេ បទចេតិយំ ទស្សេសិ. តំ វីចីសុ អាគតាសុ បិធីយតិ, គតាសុ វិវរីយតិ, មហាសក្ការប្បត្តំ អហោសិ. សត្ថា តតោ និក្ខម្ម សច្ចពន្ធបព្ពតំ គន្ត្វា សច្ចពន្ធំ អាហ – ‘‘តយា មហាជនោ អបាយមគ្គេ ឱតារិតោ, ត្វំ ឥធេវ វសិត្វា ឯតេសំ លទ្ធិំ វិស្សជ្ជាបេត្វា និព្ពានមគ្គេ បតិដ្ឋាបេហី’’តិ. សោបិ បរិចរិតព្ពំ យាចិ. សត្ថា ឃនបិដ្ឋិបាសាណេ អល្លមត្តិកបិណ្ឌម្ហិ លញ្ឆនំ វិយ បទចេតិយំ ទស្សេសិ, តតោ ជេតវនមេវ គតោ. ឯតមត្ថំ សន្ធាយ តេនេវន្តរវស្សេនាតិអាទិ វុត្តំ.

បរិនិព្ពាយីតិ អនុបាទិសេសាយ និព្ពានធាតុយា បរិនិព្ពាយិ. មហាជនោ ថេរស្ស សត្ត ទិវសានិ សរីរបូជំ កត្វា ពហូនិ គន្ធកដ្ឋានិ សមោធានេត្វា សរីរំ ឈាបេត្វា ធាតុយោ អាទាយ ចេតិយំ អកាសិ. សម្ពហុលា ភិក្ខូតិ ថេរស្ស អាឡាហនេ ឋិតភិក្ខូ. សេសំ សព្ពត្ថ ឧត្តានមេវាតិ.

បបញ្ចសូទនិយា មជ្ឈិមនិកាយដ្ឋកថាយ

បុណ្ណោវាទសុត្តវណ្ណនា និដ្ឋិតា.