៨. មធុបិណ្ឌិកសុត្តវណ្ណនា

១៩៩. ឯវំ មេ សុតន្តិ មធុបិណ្ឌិកសុត្តំ. តត្ថ មហាវនន្តិ ហិមវន្តេន សទ្ធិំ ឯកាពទ្ធំ អរោបិមំ ជាតិវនំ, ន យថា វេសាលិយំ រោបិតារោបិតមិស្សកំ. ទិវាវិហារាយាតិ ទិវា បដិសល្លានត្ថាយ. ពេលុវលដ្ឋិកាយាតិ តរុណពេលុវរុក្ខស្ស. ទណ្ឌបាណីតិ ន ជរាទុព្ពលតាយ ទណ្ឌហត្ថោ. អយញ្ហិ តរុណោ បឋមវយេ ឋិតោ, ទណ្ឌចិត្តតាយ បន សុវណ្ណទណ្ឌំ គហេត្វា វិចរតិ, តស្មា ទណ្ឌបាណីតិ វុត្តោ. ជង្ឃាវិហារន្តិ ជង្ឃាកិលមថវិនោទនត្ថំ ជង្ឃាចារំ. អនុចង្កមមានោ អនុវិចរមានោតិ អារាមទស្សន-វនទស្សន-បព្ពតទស្សនាទីនំ អត្ថាយ ឥតោ ចិតោ ច វិចរមានោ. អធិច្ចនិក្ខមនោ កិរេស កទាចិ ទេវ និក្ខមិត្វា ឯវំ វិចរតិ. ទណ្ឌមោលុព្ភាតិ ទណ្ឌំ ឱលុម្ភិត្វា គោបាលកទារកោ វិយ ទណ្ឌំ បុរតោ ឋបេត្វា ទណ្ឌមត្ថកេ ទ្វេ ហត្ថេ បតិដ្ឋាបេត្វា បិដ្ឋិបាណិំ ហនុកេន ឧប្បីឡេត្វា ឯកមន្តំ អដ្ឋាសិ.

២០០. កិំវាទីតិ កិំទិដ្ឋិកោ. កិមក្ខាយីតិ កិំ កថេតិ. អយំ រាជា ភគវន្តំ អវន្ទិត្វា បដិសន្ថារមត្តកមេវ កត្វា បញ្ហំ បុច្ឆតិ. តម្បិ ន អញ្ញាតុកាមតាយ, អចិត្តីការេន បុច្ឆតិ. កស្មា? ទេវទត្តស្ស បក្ខិកោ កិរេស. ទេវទត្តោ អត្តនោ សន្តិកំ អាគច្ឆមានេ តថាគតេ ភិន្ទតិ. សោ កិរ ឯវំ វទេតិ ‘‘សមណោ គោតមោ អម្ហាកំ កុលេន សទ្ធិំ វេរី, ន នោ កុលស្ស វុទ្ធិំ ឥច្ឆតិ. ភគិនីបិ មេ ចក្កវត្តិបរិភោគា, តំ បហាយ ‘នស្សតេសា’តិ និក្ខមិត្វា បព្ពជិ. ភាគិនេយ្យោបិ មេ ចក្កវត្តិពីជន្តិ ញត្វា អម្ហាកំ កុលស្ស វឌ្ឍិយា អតុស្សន្តោ ‘នស្សតេត’ន្តិ តម្បិ ទហរកាលេយេវ បព្ពាជេសិ. អហំ បន តេន វិនា វត្តិតុំ អសក្កោន្តោ អនុបព្ពជិតោ. ឯវំ បព្ពជិតម្បិ មំ បព្ពជិតទិវសតោ បដ្ឋាយ ន ឧជុកេហិ អក្ខីហិ ឱលោកេតិ. បរិសមជ្ឈេ ភាសន្តោបិ មហាផរសុនា បហរន្តោ វិយ អាបាយិកោ ទេវទត្តោតិអាទីនិ ភាសតី’’តិ. ឯវំ អយម្បិ រាជា ទេវទត្តេន ភិន្នោ, តស្មា ឯវមកាសិ.

អថ ភគវា យថា អយំ រាជា មយា បញ្ហេ បុច្ឆិតេ ន កថេតីតិ វត្តុំ ន លភតិ, យថា ច ភាសិតស្ស អត្ថំ ន ជានាតិ, ឯវមស្ស កថេស្សាមីតិ តស្សានុច្ឆវិកំ កថេន្តោ យថាវាទី ខោតិអាទិមាហ.

តត្ថ ន កេនចិ លោកេ វិគ្គយ្ហ តិដ្ឋតីតិ លោកេ កេនចិ សទ្ធិំ វិគ្គាហិកកថំ ន ករោតិ ន វិវទតិ. តថាគតោ ហិ លោកេន សទ្ធិំ ន វិវទតិ; លោកោ បន តថាគតេន សទ្ធិំ អនិច្ចន្តិ វុត្តេ និច្ចន្តិ វទមានោ, ទុក្ខំ, អនត្តា, អសុភន្តិ វុត្តេ សុភន្តិ វទមានោ វិវទតិ. តេនេវាហ ‘‘នាហំ, ភិក្ខវេ, លោកេន វិវទាមិ, លោកោវ ខោ, ភិក្ខវេ, មយា វិវទតិ, តថា ន, ភិក្ខវេ, ធម្មវាទី កេនចិ លោកស្មិំ វិវទតិ, អធម្មវាទីវ ខោ, ភិក្ខវេ, វិវទតី’’តិ (សំ. និ. ៣.៩៤). យថាតិ យេន ការណេន. កាមេហីតិ វត្ថុកាមេហិបិ កិលេសកាមេហិបិ. តំ ព្រាហ្មណន្តិ តំ ខីណាសវំ ព្រាហ្មណំ. អកថំកថិន្តិ និព្ពិចិកិច្ឆំ. ឆិន្នកុក្កុច្ចន្តិ វិប្បដិសារកុក្កុច្ចស្ស ចេវ ហត្ថបាទកុក្កុច្ចស្ស ច ឆិន្នត្តា ឆិន្នកុក្កុច្ចំ. ភវាភវេតិ បុនប្បុនព្ភវេ, ហីនបណីតេ វា ភវេ, បណីតោ ហិ ភវោ វុទ្ធិប្បត្តោ អភវោតិ វុច្ចតិ. សញ្ញាតិ កិលេសសញ្ញា. កិលេសាយេវ វា ឥធ សញ្ញានាមេន វុត្តា, តស្មា យេន ការណេន កាមេហិ វិសំយុត្តំ វិហរន្តំ តំ លោកេ និន្នាវាទិំ ខីណាសវព្រាហ្មណំ កិលេសសញ្ញា នានុសេន្តិ, តញ្ច ការណំ អហំ វទាមីតិ អយមេត្ថ អត្ថោ. ឥតិ ភគវា អត្តនោ ខីណាសវភាវំ ទីបេតិ. និល្លាឡេត្វាតិ នីហរិត្វា កីឡាបេត្វា. តិវិសាខន្តិ តិសាខំ. នលាដិកន្តិ វលិភង្គំ នលាដេ តិស្សោ រាជិយោ ទស្សេន្តោ វលិភង្គំ វុដ្ឋាបេត្វាតិ អត្ថោ. ទណ្ឌមោលុព្ភាតិ ទណ្ឌំ ឧប្បីឡេត្វា. ‘‘ទណ្ឌមាលុព្ភា’’តិបិ បាឋោ, គហេត្វា បក្កាមីតិ អត្ថោ.

២០១. អញ្ញតរោតិ នាមេន អបាកដោ ឯកោ ភិក្ខុ. សោ កិរ អនុសន្ធិកុសលោ, ភគវតា យថា ទណ្ឌបាណី ន ជានាតិ, តថា មយា កថិតន្តិ វុត្តេ កិន្តិ នុ ខោ ភគវតា អវិញ្ញេយ្យំ កត្វា បញ្ហោ កថិតោតិ អនុសន្ធិំ គហេត្វា ទសពលំ យាចិត្វា ឥមំ បញ្ហំ ភិក្ខុសង្ឃស្ស បាកដំ ករិស្សាមីតិ ឧដ្ឋាយាសនា ឯកំសំ ឧត្តរាសង្គំ ករិត្វា ទសនខសមុជ្ជលំ អញ្ជលិំ បគ្គយ្ហ កិំវាទី បន, ភន្តេ ភគវាតិអាទិមាហ.

យតោនិទានន្តិ ភាវនបុំសកំ ឯតំ, យេន ការណេន យស្មិំ ការណេ សតីតិ អត្ថោ. បបញ្ចសញ្ញាសង្ខាតិ ឯត្ថ សង្ខាតិ កោដ្ឋាសោ. បបញ្ចសញ្ញាតិ តណ្ហាមានទិដ្ឋិបបញ្ចសម្បយុត្តា សញ្ញា, សញ្ញានាមេន វា បបញ្ចាយេវ វុត្តា. តស្មា បបញ្ចកោដ្ឋាសាតិ អយមេត្ថ អត្ថោ. សមុទាចរន្តីតិ បវត្តន្តិ. ឯត្ថ ចេ នត្ថិ អភិនន្ទិតព្ពន្តិ យស្មិំ ទ្វាទសាយតនសង្ខាតេ ការណេ សតិ បបញ្ចសញ្ញាសង្ខា សមុទាចរន្តិ, ឯត្ថ ឯកាយតនម្បិ ចេ អភិនន្ទិតព្ពំ អភិវទិតព្ពំ អជ្ឈោសិតព្ពំ នត្ថីតិ អត្ថោ. តត្ថ អភិនិន្ទិតព្ពន្តិ អហំ មមន្តិ អភិនន្ទិតព្ពំ. អភិវទិតព្ពន្តិ អហំ មមាតិ វត្តព្ពំ. អជ្ឈោសិតព្ពន្តិ អជ្ឈោសិត្វា គិលិត្វា បរិនិដ្ឋបេត្វា គហេតព្ពយុត្តំ. ឯតេនេត្ថ តណ្ហាទីនំយេវ អប្បវត្តិំ កថេតិ. ឯសេវន្តោតិ អយំ អភិនន្ទនាទីនំ នត្ថិភាវោវ រាគានុសយាទីនំ អន្តោ. ឯសេវ នយោ សព្ពត្ថ.

ទណ្ឌាទានាទីសុ បន យាយ ចេតនាយ ទណ្ឌំ អាទិយតិ, សា ទណ្ឌាទានំ. យាយ សត្ថំ អាទិយតិ បរាមសតិ, សា សត្ថាទានំ. មត្ថកប្បត្តំ កលហំ. នានាគាហមត្តំ វិគ្គហំ. នានាវាទមត្តំ វិវាទំ. តុវំ តុវន្តិ ឯវំ បវត្តំ តុវំ តុវំ. បិយសុញ្ញករណំ បេសុញ្ញំ. អយថាសភាវំ មុសាវាទំ ករោតិ, សា មុសាវាទោតិ វេទិតព្ពា. ឯត្ថេតេតិ ឯត្ថ ទ្វាទសសុ អាយតនេសុ ឯតេ កិលេសា. កិលេសា ហិ ឧប្បជ្ជមានាបិ ទ្វាទសាយតនានិ និស្សាយ ឧប្បជ្ជន្តិ, និរុជ្ឈមានាបិ ទ្វាទសសុ អាយតនេសុយេវ និរុជ្ឈន្តិ. ឯវំ យត្ថុប្បន្នា, តត្ថេវ និរុទ្ធា ហោន្តិ. ស្វាយមត្ថោ សមុទយសច្ចបញ្ហេន ទីបេតព្ពោ –

‘‘សា ខោ បនេសា តណ្ហា កត្ថ ឧប្បជ្ជមានា ឧប្បជ្ជតិ, កត្ថ និវិសមានា និវិសតី’’តិ វត្វា – ‘‘យំ លោកេ បិយរូបំ សាតរូបំ, ឯត្ថេសា តណ្ហា ឧប្បជ្ជមានា ឧប្បជ្ជតិ, ឯត្ថ និវិសមានា និវិសតិ. កិញ្ច លោកេ បិយរូបំ សាតរូបំ? ចក្ខុ លោកេ បិយរូបំ សាតរូប’’ន្តិអាទិនា (វិភ. ២០៣) នយេន ទ្វាទសសុយេវ អាយតនេសុ តស្សា ឧប្បត្តិ ច និរោធោ ច វុត្តោ. យថេវ ច តណ្ហា ទ្វាទសសុ អាយតនេសុ ឧប្បជ្ជិត្វា និព្ពានំ អាគម្ម និរុទ្ធាបិ អាយតនេសុ បុន សមុទាចារស្ស អភាវតោ អាយតនេសុយេវ និរុទ្ធាតិ វុត្តា, ឯវមិមេបិ បាបកា អកុសលា ធម្មា អាយតនេសុ និរុជ្ឈន្តីតិ វេទិតព្ពា. អថ វា យ្វាយំ អភិនន្ទនាទីនំ អភាវោវ រាគានុសយាទីនំ អន្តោតិ វុត្តោ. ឯត្ថេតេ រាគានុសយាទីនំ អន្តោតិ លទ្ធវោហារេ និព្ពានេ បាបកា អកុសលា ធម្មា អបរិសេសា និរុជ្ឈន្តិ. យញ្ហិ យត្ថ នត្ថិ, តំ តត្ថ និរុទ្ធំ នាម ហោតិ, ស្វាយមត្ថោ និរោធបញ្ហេន ទីបេតព្ពោ. វុត្តញ្ហេតំ ‘‘ទុតិយំ ឈានំ សមាបន្នស្ស វិតក្កវិចារា វចីសង្ខារា បដិប្បស្សទ្ធា ហោន្តី’’តិអាទិ (បដិ. ម. ១.៨៣).

២០២. សត្ថុ ចេវ សំវណ្ណិតោតិ សត្ថារា ច បសំសិតោ. វិញ្ញូនន្តិ ឥទម្បិ ករណត្ថេ សាមិវចនំ, បណ្ឌិតេហិ សព្រហ្មចារីហិ ច សម្ភាវិតោតិ អត្ថោ. បហោតីតិ សក្កោតិ.

២០៣. អតិក្កម្មេវ មូលំ អតិក្កម្ម ខន្ធន្តិ សារោ នាម មូលេ វា ខន្ធេ វា ភវេយ្យ, តម្បិ អតិក្កមិត្វាតិ អត្ថោ. ឯវំសម្បទន្តិ ឯវំសម្បត្តិកំ, ឦទិសន្តិ អត្ថោ. អតិសិត្វាតិ អតិក្កមិត្វា. ជានំ ជានាតីតិ ជានិតព្ពមេវ ជានាតិ. បស្សំ បស្សតីតិ បស្សិតព្ពមេវ បស្សតិ. យថា វា ឯកច្ចោ វិបរីតំ គណ្ហន្តោ ជានន្តោបិ ន ជានាតិ, បស្សន្តោបិ ន បស្សតិ, ន ឯវំ ភគវា. ភគវា បន ជានន្តោ ជានាតិយេវ, បស្សន្តោ បស្សតិយេវ. ស្វាយំ ទស្សនបរិណាយកដ្ឋេន ចក្ខុភូតោ. វិទិតករណដ្ឋេន ញាណភូតោ. អវិបរីតសភាវដ្ឋេន បរិយត្តិធម្មប្បវត្តនតោ វា ហទយេន ចិន្តេត្វា វាចាយ និច្ឆារិតធម្មមយោតិ ធម្មភូតោ. សេដ្ឋដ្ឋេន ព្រហ្មភូតោ. អថ វា ចក្ខុ វិយ ភូតោតិ ចក្ខុភូតោតិ ឯវមេតេសុ បទេសុ អត្ថោ វេទិតព្ពោ. ស្វាយំ ធម្មស្ស វត្តនតោ វត្តា. បវត្តាបនតោ បវត្តា. អត្ថំ នីហរិត្វា ទស្សនសមត្ថតាយ អត្ថស្ស និន្នេតា. អមតាធិគមាយ បដិបត្តិំ ទទាតីតិ អមតស្ស ទាតា. អគរុំ កត្វាតិ បុនប្បុនំ អាយាចាបេន្តោបិ ហិ គរុំ ករោតិ នាម, អត្តនោ សាវកបារមីញាណេ ឋត្វា សិនេរូបាទតោ វាលុកំ ឧទ្ធរមានោ វិយ ទុព្ពិញ្ញេយ្យំ កត្វា កថេន្តោបិ គរុំ ករោតិយេវ នាម. ឯវំ អកត្វា អម្ហេ បុនប្បុនំ អយាចាបេត្វា សុវិញ្ញេយ្យម្បិ នោ កត្វា កថេហីតិ វុត្តំ ហោតិ.

២០៤. យំ ខោ នោ អាវុសោតិ ឯត្ថ កិញ្ចាបិ ‘‘យំ ខោ វោ’’តិ វត្តព្ពំ សិយា, តេ បន ភិក្ខូ អត្តនា សទ្ធិំ សង្គណ្ហន្តោ ‘‘យំ ខោ នោ’’តិ អាហ. យស្មា វា ឧទ្ទេសោវ តេសំ ឧទ្ទិដ្ឋោវ. ភគវា បន ថេរស្សាបិ តេសម្បិ ភគវាវ. តស្មា ភគវាតិ បទំ សន្ធាយបិ ឯវមាហ, យំ ខោ អម្ហាកំ ភគវា តុម្ហាកំ សំខិត្តេន ឧទ្ទេសំ ឧទ្ទិសិត្វាតិ អត្ថោ.

ចក្ខុញ្ចាវុសោតិអាទីសុ អយមត្ថោ, អាវុសោ, និស្សយភាវេន ចក្ខុបសាទញ្ច អារម្មណភាវេន ចតុសមុដ្ឋានិករូបេ ច បដិច្ច ចក្ខុវិញ្ញាណំ នាម ឧប្បជ្ជតិ. តិណ្ណំ សង្គតិ ផស្សោតិ តេសំ តិណ្ណំ សង្គតិយា ផស្សោ នាម ឧប្បជ្ជតិ. តំ ផស្សំ បដិច្ច សហជាតាទិវសេន ផស្សបច្ចយា វេទនា ឧប្បជ្ជតិ. តាយ វេទនាយ យំ អារម្មណំ វេទេតិ, តទេវ សញ្ញា សញ្ជានាតិ, យំ សញ្ញា សញ្ជានាតិ, តទេវ អារម្មណំ វិតក្កោ វិតក្កេតិ. យំ វិតក្កោ វិតក្កេតិ, តទេវារម្មណំ បបញ្ចោ បបញ្ចេតិ. តតោនិទានន្តិ ឯតេហិ ចក្ខុរូបាទីហិ ការណេហិ. បុរិសំ បបញ្ចសញ្ញាសង្ខា សមុទាចរន្តីតិ តំ អបរិញ្ញាតការណំ បុរិសំ បបញ្ចកោដ្ឋាសា អភិភវន្តិ, តស្ស បវត្តន្តីតិ អត្ថោ. តត្ថ ផស្សវេទនាសញ្ញា ចក្ខុវិញ្ញាណេន សហជាតា ហោន្តិ. វិតក្កោ ចក្ខុវិញ្ញាណានន្តរាទីសុ សវិតក្កចិត្តេសុ ទដ្ឋព្ពោ. បបញ្ចសង្ខា ជវនេន សហជាតា ហោន្តិ. យទិ ឯវំ កស្មា អតីតានាគតគ្គហណំ កតន្តិ? តថា ឧប្បជ្ជនតោ. យថេវ ហិ ឯតរហិ ចក្ខុទ្វារិកោ បបញ្ចោ ចក្ខុញ្ច រូបេ ច ផស្សវេទនាសញ្ញាវិតក្កេ ច បដិច្ច ឧប្បន្នោ, ឯវមេវំ អតីតានាគតេសុបិ ចក្ខុវិញ្ញេយ្យេសុ រូបេសុ តស្សុប្បត្តិំ ទស្សេន្តោ ឯវមាហ.

សោតញ្ចាវុសោតិអាទីសុបិ ឯសេវ នយោ. ឆដ្ឋទ្វារេ បន មនន្តិ ភវង្គចិត្តំ. ធម្មេតិ តេភូមកធម្មារម្មណំ. មនោវិញ្ញាណន្តិ អាវជ្ជនំ វា ជវនំ វា. អាវជ្ជនេ គហិតេ ផស្សវេទនាសញ្ញាវិតក្កា អាវជ្ជនសហជាតា ហោន្តិ. បបញ្ចោ ជវនសហជាតោ. ជវនេ គហិតេ សហាវជ្ជនកំ ភវង្គ មនោ នាម ហោតិ, តតោ ផស្សាទយោ សព្ពេបិ ជវនេន សហជាតាវ. មនោទ្វារេ បន យស្មា អតីតាទិភេទំ សព្ពម្បិ អារម្មណំ ហោតិ, តស្មា អតីតានាគតបច្ចុប្បន្នេសូតិ ឥទំ យុត្តមេវ.

ឥទានិ វដ្ដំ ទស្សេន្តោ សោ វតាវុសោតិ ទេសនំ អារភិ. ផស្សបញ្ញត្តិំ បញ្ញបេស្សតីតិ ផស្សោ នាម ឯកោ ធម្មោ ឧប្បជ្ជតីតិ ឯវំ ផស្សបញ្ញត្តិំ បញ្ញបេស្សតិ, ទស្សេស្សតីតិ អត្ថោ. ឯស នយោ សព្ពត្ថ. ឯវំ ឥមស្មិំ សតិ ឥទំ ហោតីតិ ទ្វាទសាយតនវសេន សកលំ វដ្ដំ ទស្សេត្វា ឥទានិ ទ្វាទសាយតនបដិក្ខេបវសេន វិវដ្ដំ ទស្សេន្តោ សោ វតាវុសោ ចក្ខុស្មិំ អសតីតិ ទេសនំ អារភិ. តត្ថ វុត្តនយេនេវ អត្ថោ វេទិតព្ពោ.

ឯវំ បញ្ហំ វិស្សជ្ជេត្វា ឥទានិ សាវកេន បញ្ហោ កថិតោតិ មា និក្កង្ខា អហុវត្ថ, អយំ ភគវា សព្ពញ្ញុតញាណតុលំ គហេត្វា និសិន្នោ, ឥច្ឆមានា តមេវ ឧបសង្កមិត្វា និក្កង្ខា ហោថាតិ ឧយ្យោជេន្តោ អាកង្ខមានា ច បនាតិអាទិមាហ.

២០៥. ឥមេហិ អាការេហីតិ ឥមេហិ ការណេហិ បបញ្ចុប្បត្តិយា បាដិយេក្កការណេហិ ចេវ វដ្ដវិវដ្ដការណេហិ ច. ឥមេហិ បទេហីតិ ឥមេហិ អក្ខរសម្បិណ្ឌនេហិ. ព្យញ្ជនេហីតិ បាដិយេក្កអក្ខរេហិ. បណ្ឌិតោតិ បណ្ឌិច្ចេន សមន្នាគតោ. ចតូហិ វា ការណេហិ បណ្ឌិតោ ធាតុកុសលោ អាយតនកុសលោ បច្ចយាការកុសលោ ការណាការណកុសលោតិ. មហាបញ្ញោតិ មហន្តេ អត្ថេ មហន្តេ ធម្មេ មហន្តា និរុត្តិយោ មហន្តានិ បដិភានានិ បរិគ្គហណសមត្ថាយ មហាបញ្ញាយ សមន្នាគតោ. យថា តំ មហាកច្ចានេនាតិ យថា មហាកច្ចានេន ព្យាកតំ, តំ សន្ធាយ តន្តិ វុត្តំ. យថា មហាកច្ចានេន ព្យាកតំ, អហម្បិ តំ ឯវមេវំ ព្យាករេយ្យេន្តិ អត្ថោ.

មធុបិណ្ឌិកន្តិ មហន្តំ គុឡបូវំ ពទ្ធសត្តុគុឡកំ វា. អសេចនកន្តិ អសេចិតព្ពកំ. សប្បិផាណិតមធុសក្ករាទីសុ ឥទំ នាមេត្ថ មន្ទំ ឥទំ ពហុកន្តិ ន វត្តព្ពំ សមយោជិតរសំ. ចេតសោតិ ចិន្តកជាតិកោ. ទព្ពជាតិកោតិ បណ្ឌិតសភាវោ. កោ នាមោ អយន្តិ ឥទំ ថេរោ អតិភទ្ទកោ អយំ ធម្មបរិយាយោ, ទសពលស្ស សព្ពញ្ញុតញ្ញាណេនេវស្ស នាមំ គណ្ហាបេស្សាមីតិ ចិន្តេត្វា អាហ. តស្មាតិ យស្មា មធុបិណ្ឌិកោ វិយ មធុរោ, តស្មា មធុបិណ្ឌិកបរិយាយោត្វេវ នំ ធារេហីតិ វទតិ. សេសំ សព្ពត្ថ ឧត្តានត្ថមេវាតិ.

បបញ្ចសូទនិយា មជ្ឈិមនិកាយដ្ឋកថាយ

មធុបិណ្ឌិកសុត្តវណ្ណនា និដ្ឋិតា.