១. បឋមអគារិយវិមានវណ្ណនា

យថា វនំ ចិត្តលតំ បភាសតីតិ អគារិយវិមានំ. តស្ស កា ឧប្បត្តិ? ភគវា រាជគហេ វិហរតិ វេឡុវនេ. តេន សមយេន រាជគហេ ឯកំ កុលំ ឧភតោបសន្នំ ហោតិ សីលាចារសម្បន្នំ ឱបានភូតំ ភិក្ខូនំ ភិក្ខុនីនំ. តេ ទ្វេ ជយម្បតិកា រតនត្តយំ ឧទ្ទិស្ស យាវជីវំ បុញ្ញានិ កត្វា តតោ ចុតា តាវតិំសេសុ និព្ពត្តិំសុ, តេសំ ទ្វាទសយោជនិកំ កនកវិមានំ និព្ពត្តិ. តេ តត្ថ ទិព្ពសម្បត្តិំ អនុភវន្តិ. អថាយស្មា មហាមោគ្គល្លានោតិអាទិ ហេដ្ឋា វុត្តនយេនេវ វេទិតព្ពំ.

១០៤៨. ‘‘យថា វនំ ចិត្តលតំ បភាសតិ, ឧយ្យានសេដ្ឋំ តិទសានមុត្តមំ;

តថូបមំ តុយ្ហមិទំ វិមានំ, ឱភាសយំ តិដ្ឋតិ អន្តលិក្ខេ.

១០៤៩. ‘‘ទេវិទ្ធិបត្តោសិ មហានុភាវោ, មនុស្សភូតោ កិមកាសិ បុញ្ញំ;

កេនាសិ ឯវំ ជលិតានុភាវោ, វណ្ណោ ច តេ សព្ពទិសា បភាសតី’’តិ. –

ថេរោ បុច្ឆិ.

១០៥០. ‘‘សោ ទេវបុត្តោ អត្តមនោ, មោគ្គល្លានេន បុច្ឆិតោ;

បញ្ហំ បុដ្ឋោ វិយាកាសិ, យស្ស កម្មស្សិទំ ផលំ’’.

១០៥១. ‘‘អហញ្ច ភរិយា ច មនុស្សលោកេ, ឱបានភូតា ឃរមាវសិម្ហ;

អន្នញ្ច បានញ្ច បសន្នចិត្តា, សក្កច្ច ទានំ វិបុលំ អទម្ហ.

១០៥២. ‘‘តេន មេតាទិសោ វណ្ណោ…បេ…

វណ្ណោ ច មេ សព្ពទិសា បភាសតី’’តិ. –

អត្តនោ សម្បត្តិំ ព្យាកាសិ. គាថាសុបិ អបុព្ពំ នត្ថិ.

បឋមអគារិយវិមានវណ្ណនា និដ្ឋិតា.