៨. បឋមសូចិវិមានវណ្ណនា

ឧច្ចមិទំ មណិថូណំ វិមានន្តិ សូចិវិមានំ. តស្ស កា ឧប្បត្តិ? ភគវា រាជគហេ វិហរតិ វេឡុវនេ. តេន សមយេន អាយស្មតោ សារិបុត្តស្ស ចីវរកម្មំ កាតព្ពំ ហោតិ, អត្ថោ ច ហោតិ សូចិយា. សោ រាជគហេ បិណ្ឌាយ ចរន្តោ កម្មារស្ស គេហទ្វារេ អដ្ឋាសិ. តំ ទិស្វា កម្មារោ អាហ ‘‘កេន, ភន្តេ, អត្ថោ’’តិ? ‘‘ចីវរកម្មំ កាតព្ពំ អត្ថិ, សូចិយា អត្ថោ’’តិ. កម្មារោ បសន្នមានសោ កតបរិយោសិតា ទ្វេ សូចិយោ ទត្វា ‘‘បុនបិ, ភន្តេ, សូចិយា អត្ថេ សតិ មម អាចិក្ខេយ្យាថា’’តិ វត្វា បញ្ចបតិដ្ឋិតេន វន្ទិ. ថេរោ តស្ស អនុមោទនំ កត្វា បក្កាមិ. សោ អបរភាគេ កាលំ កត្វា តាវតិំសេសុ ឧប្បជ្ជិ. អថ អាយស្មា មហាមោគ្គល្លានោ ទេវចារិកំ ចរន្តោ តំ ទេវបុត្តំ ឥមាហិ គាថាហិ បុច្ឆិ –

៩៤៤. ‘‘ឧច្ចមិទំ មណិថូណំ វិមានំ…បេ…

វណ្ណោ ច តេ សព្ពទិសា បភាសតី’’តិ.

៩៤៨. ‘‘សោ ទេវបុត្តោ អត្តមនោ…បេ… យស្ស កម្មស្សិទំ ផលំ’’.

៩៤៩. ‘‘យំ ទទាតិ ន តំ ហោតិ, យញ្ចេវ ទជ្ជា តញ្ចេវ សេយ្យោ;

សូចិ ទិន្នា សូចិមេវ សេយ្យោ.

៩៥០. ‘‘តេន មេតាទិសោ វណ្ណោ…បេ…

វណ្ណោ ច មេ សព្ពទិសា បភាសតី’’តិ.

៩៤៩. តត្ថ យំ ទទាតីតិ យាទិសំ ទេយ្យធម្មំ ទទាតិ. ន តំ ហោតីតិ តស្ស តាទិសមេវ ផលំ ន ហោតិ. អថ ខោ ខេត្តសម្បត្តិយា ច ចិត្តសម្បត្តិយា ច តតោ វិបុលតរំ ឧឡារតរមេវ ផលំ ហោតិ. តស្មា យញ្ចេវ ទជ្ជា តញ្ចេវ សេយ្យោតិ យំកិញ្ចិទេវ វិជ្ជមានំ ទជ្ជា ទទេយ្យ, តញ្ចេវ តទេវ សេយ្យោ, យស្ស កស្សចិ អនវជ្ជស្ស ទេយ្យធម្មស្ស ទានមេវ សេយ្យោ, កស្មា? មយា ហិ សូចិ ទិន្នា សូចិមេវ សេយ្យោ, សូចិទានមេវ មយ្ហំ សេយ្យំ ជាតំ, យតោ អយមីទិសី សម្បត្តិ លទ្ធាតិ អធិប្បាយោ.

សូចិវិមានវណ្ណនា និដ្ឋិតា.