៨. អម្ពវិមានវណ្ណនា

ទិព្ពំ តេ អម្ពវនំ រម្មន្តិ អម្ពវិមានំ. តស្ស កា ឧប្បត្តិ? ភគវា សាវត្ថិយំ វិហរតិ ជេតវនេ. តេន សមយេន សាវត្ថិយំ អញ្ញតរា ឧបាសិកា អាវាសទានស្ស មហប្ផលតំ មហានិសំសតញ្ច សុត្វា ឆន្ទជាតា ភគវន្តំ អភិវាទេត្វា ឯវមាហ ‘‘អហំ, ភន្តេ, ឯកំ អាវាសំ ការេតុកាមា, ឥច្ឆាមិ តាទិសំ ឱកាសំ, អាចិក្ខតូ’’តិ. ភគវា ភិក្ខូ អាណាបេសិ, ភិក្ខូ តស្សា ឱកាសំ ទស្សេសុំ. សា តត្ថ រមណីយំ អាវាសំ ការេត្វា តស្ស សមន្តតោ អម្ពរុក្ខេ រោបេសិ. សោ អាវាសោ សមន្តតោ អម្ពបន្តីហិ បរិក្ខិត្តោ ឆាយូទកសម្បន្នោ មុត្តាជាលសទិសវាលុកាកិណ្ណបណ្ឌរភូមិភាគោ អតិវិយ មនោហរោ អហោសិ. សា តំ វិហារំ នានាវណ្ណេហិ វត្ថេហិ បុប្ផទាមគន្ធទាមាទីហិ ច ទេវវិមានំ វិយ អលង្ករិត្វា តេលបទីបំ អារោបេត្វា អម្ពរុក្ខេ ច អហតេហិ វត្ថេហិ វេឋេត្វា សង្ឃស្ស និយ្យាទេសិ.

សា អបរភាគេ កាលំ កត្វា តាវតិំសភវនេ និព្ពត្តិ, តស្សា មហន្តំ វិមានំ បាតុរហោសិ អម្ពវនបរិក្ខិត្តំ. សា តត្ថ អច្ឆរាគណបរិវារិតា ទិព្ពសម្បត្តិំ អនុភវតិ. តំ អាយស្មា មហាមោគ្គល្លានោ ឧបគន្ត្វា ឥមាហិ គាថាហិ បុច្ឆិ –

៧៨៣. ‘‘ទិព្ពំ តេ អម្ពវនំ រម្មំ, បាសាទេត្ថ មហល្លកោ;

នានាតូរិយសង្ឃុដ្ឋោ, អច្ឆរាគណឃោសិតោ.

៧៨៤. ‘‘បទីបោ ចេត្ថ ជលតិ, និច្ចំ សោវណ្ណយោ មហា;

ទុស្សផលេហិ រុក្ខេហិ, សមន្តា បរិវារិតោ.

៧៨៥. ‘‘កេន តេតាទិសោ វណ្ណោ…បេ…វណ្ណោ ច តេ សព្ពទិសា បភាសតី’’តិ.

៧៨៧. ‘‘សា ទេវតា អត្តមនា…បេ… យស្ស កម្មស្សិទំ ផលំ’’.

៧៨៨. ‘‘អហំ មនុស្សេសុ មនុស្សភូតា, បុរិមាយ ជាតិយា មនុស្សលោកេ;

វិហារំ សង្ឃស្ស ការេសិំ, អម្ពេហិ បរិវារិតំ.

៧៨៩. ‘‘បរិយោសិតេ វិហារេ, ការេន្តេ និដ្ឋិតេ មហេ;

អម្ពេហិ ឆាទយិត្វាន, កត្វា ទុស្សមយេ ផលេ.

៧៩០. ‘‘បទីបំ តត្ថ ជាលេត្វា, ភោជយិត្វា គណុត្តមំ;

និយ្យាទេសិំ តំ សង្ឃស្ស, បសន្នា សេហិ បាណិភិ.

៧៩១. ‘‘តេន មេ អម្ពវនំ រម្មំ, បាសាទេត្ថ មហល្លកោ;

នានាតូរិយសង្ឃុដ្ឋោ, អច្ឆរាគណឃោសិតោ.

៧៩២. ‘‘បទីបោ ចេត្ថ ជលតិ, និច្ចំ សោវណ្ណយោ មហា;

ទុស្សផលេហិ រុក្ខេហិ, សមន្តា បរិវារិតោ.

៧៩៣. ‘‘តេន មេតាទិសោ វណ្ណោ…បេ…វណ្ណោ ច មេ សព្ពទិសា បភាសតី’’តិ. –

សា ទេវតា ព្យាកាសិ.

៧៨៣. តត្ថ មហល្លកោតិ មហន្តោ អាយាមវិត្ថារេហិ ឧព្ពេធេន ច វិបុលោ, ឧឡារតមោតិ អត្ថោ. អច្ឆរាគណឃោសិតោតិ តំ បមោទិតុំ សង្គីតិវសេន ចេវ បិយសល្លាបវសេន ច អច្ឆរាសង្ឃេន សមុគ្ឃោសិតោ.

៧៨៤. បទីបោ ចេត្ថ ជលតីតិ សូរិយរស្មិសមុជ្ជលកិរណវិតានោ រតនប្បទីបោ ច ឯត្ថ ឯតស្មិំ បាសាទេ អភិជលតិ. ទុស្សផលេហីតិ ទុស្សានិ ផលានិ ឯតេសន្តិ ទុស្សផលា. តេហិ សមុគ្គិរិយមានទិព្ពវត្ថេហីតិ អត្ថោ.

៧៨៩. ការេន្តេ និដ្ឋិតេ មហេតិ កតបរិយោសិតស្ស វិហារស្ស មហេ បូជាយ ករីយមានាយ ច. កត្វា ទុស្សមយេ ផលេតិ ទុស្សេយេវ តេសំ អម្ពានំ ផលំ កត្វា.

៧៩០. គណុត្តមន្តិ គណានំ ឧត្តមំ ភគវតោ សាវកសង្ឃំ. និយ្យាទេសិន្តិ សម្បដិច្ឆាបេសិំ, អទាសិន្តិ អត្ថោ. សេសំ វុត្តនយមេវ.

អម្ពវិមានវណ្ណនា និដ្ឋិតា.