៧. ចតុរិត្ថិវិមានវណ្ណនា

អភិក្កន្តេន វណ្ណេនាតិ ចតុរិត្ថិវិមានំ. តស្ស កា ឧប្បត្តិ? ភគវតិ សាវត្ថិយំ វិហរន្តេ អាយស្មា មហាមោគ្គល្លានោ ហេដ្ឋា វុត្តនយេន ទេវចារិកំ ចរន្តោ តាវតិំសភវនំ គតោ. សោ តត្ថ បដិបាដិយា ឋិតេសុ ចតូសុ វិមានេសុ ចតស្សោ ទេវធីតរោ បច្ចេកំ អច្ឆរាសហស្សបរិវារា ទិព្ពសម្បត្តិំ អនុភវន្តិយោ ទិស្វា តាហិ បុព្ពេ កតកម្មំ បុច្ឆន្តោ –

៧៥៥. ‘‘អភិក្កន្តេន វណ្ណេន…បេ…វណ្ណោ ច តេ សព្ពទិសា បភាសតី’’តិ. –

ឥមាហិ គាថាហិ បដិបាដិយា បុច្ឆិ. តាបិ តស្ស បុច្ឆានន្តរំ បដិបាដិយា ព្យាករិំសុ. តំ ទស្សេតុំ –

៧៥៨. ‘‘សា ទេវតា អត្តមនា…បេ…យស្ស កម្មស្សិទំ ផល’’ន្តិ. –

អយំ គាថា វុត្តា.

តា កិរ កស្សបស្ស ភគវតោ កាលេ ឯសិកានាមកេ រដ្ឋេ បណ្ណកតេ នាម នគរេ កុលគេហេ និព្ពត្តា វយប្បត្តា តស្មិំយេវ នគរេ បតិកុលំ គតា សមគ្គវាសំ វសន្តិ. តាសុ ឯកា អញ្ញតរំ បិណ្ឌចារិកំ ភិក្ខុំ ទិស្វា បសន្នចិត្តា ឥន្ទីវរកលាបំ អទាសិ, អបរា អញ្ញស្ស នីលុប្បលហត្ថកំ អទាសិ, អបរា បទុមហត្ថកំ អទាសិ, អបរា សុមនមកុឡានិ អទាសិ. តា អបរេន សមយេន កាលំ កត្វា តាវតិំសភវនេ និព្ពត្តិំសុ, តាសំ អច្ឆរាសហស្សំ បរិវារោ អហោសិ. តា តត្ថ យាវតាយុកំ ទិព្ពសម្បត្តិំ អនុភវិត្វា តតោ ចុតា តស្សេវ កម្មស្ស វិបាកាវសេសេន អបរាបរំ តត្ថេវ សំសរន្តិយោ ឥមស្មិំ ពុទ្ធុប្បាទេ តត្ថេវ ឧប្បន្នា វុត្តនយេន អាយស្មតា មហាមោគ្គល្លានេន បុច្ឆិតា. តាសុ ឯកា អត្តនា កតំ បុព្ពកម្មំ ថេរស្ស កថេន្តី –

៧៥៩. ‘‘ឥន្ទីវរានំ ហត្ថកំ អហមទាសិំ, ភិក្ខុនោ បិណ្ឌាយ ចរន្តស្ស;

ឯសិកានំ ឧណ្ណតស្មិំ, នគរវរេ បណ្ណកតេ រម្មេ.

៧៦០. ‘‘តេន មេតាទិសោ វណ្ណោ…បេ…វណ្ណោ ច មេ សព្ពទិសា បភាសតី’’តិ. –

អាហ. អបរា –

៧៦៦. ‘‘នីលុប្បលហត្ថកំ អហមទាសិំ, ភិក្ខុនោ បិណ្ឌាយ ចរន្តស្ស;

ឯសិកានំ ឧណ្ណតស្មិំ, នគរវរេ បណ្ណកតេ រម្មេ.

៧៦៧. ‘‘តេន មេតាទិសោ វណ្ណោ…បេ…វណ្ណោ ច មេ សព្ពទិសា បភាសតី’’តិ. –

អាហ. អបរា –

៧៧៣. ‘‘ឱទាតមូលកំ ហរិតបត្តំ, ឧទកស្មិំ សរេ ជាតំ អហមទាសិំ;

ភិក្ខុនោ បិណ្ឌាយ ចរន្តស្ស, ឯសិកានំ ឧណ្ណតស្មិំ;

នគរវរេ បណ្ណកតេ រម្មេ.

៧៧៤. ‘‘តេន មេតាទិសោ វណ្ណោ…បេ…វណ្ណោ ច មេ សព្ពទិសា បភាសតី’’តិ. –

អាហ. អបរា –

៧៨០. ‘‘អហំ សុមនា សុមនស្ស សុមនមកុឡានិ, ទន្តវណ្ណានិ អហមទាសិំ;

ភិក្ខុនោ បិណ្ឌាយ ចរន្តស្ស, ឯសិកានំ ឧណ្ណតស្មិំ;

នគរវរេ បណ្ណកតេ រម្មេ.

៧៨១. ‘‘តេន មេតាទិសោ វណ្ណោ…បេ…វណ្ណោ ច មេ សព្ពទិសា បភាសតី’’តិ. –

អាហ.

៧៥៩. តត្ថ ឥន្ទីវរានំ ហត្ថកន្តិ ឧទ្ទាលកបុប្ផហត្ថំ វាតឃាតកបុប្ផកលាបំ. ឯសិកានន្តិ ឯសិការដ្ឋស្ស. ឧណ្ណតស្មិំ នគរវរេតិ ឧណ្ណតេ ភូមិបទេសេ និវិដ្ឋេ មេឃោទរំ លិហន្តេហិ វិយ អច្ចុគ្គតេហិ បាសាទកូដាគារាទីហិ ឧណ្ណតេ ឧត្តមនគរេ. បណ្ណកតេតិ ឯវំនាមកេ នគរេ.

៧៦៦. នីលុប្បលហត្ថកន្តិ កុវលយកលាបំ.

៧៧៣. ឱទាតមូលកន្តិ សេតមូលំ, ភិសមូលានំ ធវលតាយ វុត្តំ, បទុមកលាបំ សន្ធាយ វទតិ. តេនាហ ‘‘ហរិតបត្ត’’ន្តិអាទិ. តត្ថ ហរិតបត្តន្តិ នីលបត្តំ. អវិជហិតមកុឡបត្តស្ស ហិ បទុមស្ស ពាហិរបត្តានិ ហរិតវណ្ណានិ ឯវ ហោន្តិ. ឧទកស្មិំ សរេ ជាតន្តិ សរេ ឧទកម្ហិ ជាតំ, សរោរុហន្តិ អត្ថោ.

៧៨០. សុមនាតិ ឯវំនាមា. សុមនស្សាតិ សុន្ទរចិត្តស្ស. សុមនមកុឡានីតិ ជាតិសុមនបុប្ផមកុឡានិ. ទន្តវណ្ណានីតិ សជ្ជុកំ ឧល្លិខិតហត្ថិទន្តសទិសវណ្ណានិ.

ឯវំ តាហិ អត្តនា កតកម្មេ កថិតេ ថេរោ តាសំ អនុបុព្ពិំ កថំ កថេត្វា សច្ចានិ បកាសេសិ. សច្ចបរិយោសានេ សា សព្ពាបិ សហបរិវារា សោតាបន្នា អហេសុំ. ថេរោ តំ បវត្តិំ មនុស្សលោកំ អាគន្ត្វា ភគវតោ អារោចេសិ. ភគវា តមត្ថំ អដ្ឋុប្បត្តិំ កត្វា សម្បត្តបរិសាយ ធម្មំ ទេសេសិ. សា ធម្មទេសនា មហាជនស្ស សាត្ថិកា ជាតាតិ.

ចតុរិត្ថិវិមានវណ្ណនា និដ្ឋិតា.