១. មញ្ជិដ្ឋកវិមានវណ្ណនា

មញ្ជិដ្ឋកវគ្គេ មញ្ជិដ្ឋកេ វិមានស្មិន្តិ មញ្ជិដ្ឋកវិមានំ. តស្ស កា ឧប្បត្តិ? ភគវា សាវត្ថិយំ វិហរតិ ជេតវនេ. តត្ថ អញ្ញតរោ ឧបាសកោ ភគវន្តំ និមន្តេត្វា អនន្តរវិមានេ វុត្តនយេនេវ មណ្ឌបំ សជ្ជេត្វា តត្ថ និសិន្នំ សត្ថារំ បូជេត្វា ទានំ ទេតិ. តេន ច សមយេន អញ្ញតរា កុលទាសី អន្ធវនេ សុបុប្ផិតំ សាលរុក្ខំ ទិស្វា តត្ថ បុប្ផានិ គហេត្វា ហីរេហិ អាវុណិត្វា វដំសកេ កត្វា បុន ពហូនិ មុត្តបុប្ផានិ អគ្គបុប្ផានិ ច គហេត្វា នគរំ បវិដ្ឋា. តស្មិំ មណ្ឌបេ យុគន្ធរបព្ពតកុច្ឆិំ ឱភាសយមានំ ពាលសូរិយំ វិយ ឆព្ពណ្ណពុទ្ធរំសិយោ វិស្សជ្ជេត្វា និសិន្នំ, ភគវន្តំ ទិស្វា បសន្នចិត្តា តេហិ បុប្ផេហិ បូជេន្តី វដំសកានិ អាសនស្ស សមន្តតោ ឋបេត្វា ឥតរានិ ច បុប្ផានិ ឱកិរិត្វា សក្កច្ចំ វន្ទិត្វា តិក្ខត្តុំ បទក្ខិណំ កត្វា អគមាសិ. សា អបរភាគេ កាលំ កត្វា តាវតិំសភវនេ និព្ពត្តិ, តត្ថ តស្សា រត្តផលិកមយំ វិមានំ, តស្ស ច បុរតោ សុវណ្ណវាលុកាសន្ថតភូមិភាគំ មហន្តំ សាលវនំ បាតុរហោសិ. សា យទា វិមានតោ និក្ខមិត្វា សាលវនំ បវិសតិ, តទា សាលសាខា ឱនមិត្វា តស្សា ឧបរិ កុសុមានិ ឱកិរន្តិ. តំ អាយស្មា មហាមោគ្គល្លានោ ហេដ្ឋា វុត្តនយេន ឧបគន្ត្វា ឥមាហិ គាថាហិ កតកម្មំ បុច្ឆិ –

៦៨៩. ‘‘មញ្ជិដ្ឋកេ វិមានស្មិំ, សោណ្ណវាលុកសន្ថតេ;

បញ្ចង្គិកេន តូរិយេន, រមសិ សុប្បវាទិតេ.

៦៩០. ‘‘តម្ហា វិមានា ឱរុយ្ហ, និម្មិតា រតនាមយា;

ឱគាហសិ សាលវនំ, បុប្ផិតំ សព្ពកាលិកំ.

៦៩១. ‘‘យស្ស យស្សេវ សាលស្ស, មូលេ តិដ្ឋសិ ទេវតេ;

សោ សោ មុញ្ចតិ បុប្ផានិ, ឱនមិត្វា ទុមុត្តមោ.

៦៩២. ‘‘វាតេរិតំ សាលវនំ, អាធុតំ ទិជសេវិតំ;

វាតិ គន្ធោ ទិសា សព្ពា, រុក្ខោ មញ្ជូសកោ យថា.

៦៩៣. ‘‘ឃាយសេ តំ សុចិគន្ធំ, រូបំ បស្សសិ អមានុសំ;

ទេវតេ បុច្ឆិតាចិក្ខ, កិស្ស កម្មស្សិទំ ផល’’ន្តិ.

៦៨៩. តត្ថ មញ្ជិដ្ឋកេ វិមានស្មិន្តិ រត្តផលិកមយេ វិមានេ. សិន្ទុវារកណវីរមកុលសទិសវណ្ណញ្ហិ ‘‘មញ្ជិដ្ឋក’’ន្តិ វុច្ចតិ. សោណ្ណវាលុកសន្ថតេតិ សមន្តតោ វិប្បកិណ្ណាហិ សុវណ្ណវាលុកាហិ សន្ថតភូមិភាគេ. រមសិ សុប្បវាទិតេតិ សុដ្ឋុ បវាទិតេន បញ្ចង្គិកេន តូរិយេន អភិរមសិ.

៦៩០. និមិត្តា រតនាមយាតិ តវ សុចរិតសិប្បិនា អភិនិម្មិតា រតនមយា វិមានា. ឱគាហសីតិ បវិសសិ. សព្ពកាលិកន្តិ សព្ពកាលេ សុខំ សព្ពឧតុសប្បាយំ, សព្ពកាលេ បុប្ផនកំ វា.

៦៩២. វាតេរិតន្តិ យថា បុប្ផានិ ឱកិរន្តិ, ឯវំ វាតេន ឦរិតំ ចលិតំ. អាធុតន្តិ មន្ទេន មាលុតេន សណិកសណិកំ វិធូបយមានំ. ទិជសេវិតន្តិ មយូរកោកិលាទិសកុណសង្ឃេហិ ឧបសេវិតំ.

ឯវំ ថេរេន បុដ្ឋា សា ទេវតា ឥមាហិ គាថាហិ ព្យាកាសិ –

៦៩៤. ‘‘អហំ មនុស្សេសុ មនុស្សភូតា, ទាសី អយិរកុលេ អហុំ;

ពុទ្ធំ និសិន្នំ ទិស្វាន, សាលបុប្ផេហិ ឱកិរិំ.

៦៩៥. ‘‘វដំសកញ្ច សុកតំ, សាលបុប្ផមយំ អហំ;

ពុទ្ធស្ស ឧបនាមេសិំ, បសន្នា សេហិ បាណិភិ.

៦៩៦. ‘‘តាហំ កម្មំ ករិត្វាន, កុសលំ ពុទ្ធវណ្ណិតំ;

អបេតសោកា សុខិតា, សម្បមោទាមនាមយា’’តិ.

៦៩៤-៥. តត្ថ អយិរកុលេតិ អយ្យកុលេ, សាមិកគេហេតិ អត្ថោ. អហុន្តិ អហោសិំ. ឱកិរិន្តិ បុប្ផេហិ វិប្បកិរិំ. ឧបនាមេសិន្តិ បូជាវសេន ឧបនាមេសិំ. សេសំ វុត្តនយមេវ.

អថាយស្មា មហាមោគ្គល្លានោ សបរិវារាយ តស្សា ទេវតាយ ធម្មំ ទេសេត្វា មនុស្សលោកំ អាគន្ត្វា ភគវតោ តមត្ថំ និវេទេសិ. ភគវា តំ អដ្ឋុប្បត្តិំ កត្វា សម្បត្តមហាជនស្ស ធម្មំ ទេសេសិ. ទេសនា សទេវកស្ស លោកស្ស សាត្ថិកា អហោសីតិ.

មញ្ជិដ្ឋកវិមានវណ្ណនា និដ្ឋិតា.