៥-១០. តិស្សាទិថេរីគាថាវណ្ណនា

តិស្សេ យុញ្ជស្សុ ធម្មេហីតិ តិស្សាយ ថេរិយា គាថា. តស្សា វត្ថុ តិស្សាសិក្ខមានាយ វត្ថុសទិសំ. អយំ បន ថេរី ហុត្វា អរហត្តំ បាបុណិ. យថា ច អយំ, ឯវំ ឥតោ បរំ ធីរា, វីរា, មិត្តា, ភទ្រា, ឧបសមាតិ បញ្ចន្នំ ថេរីនំ វត្ថុ ឯកសទិសមេវ. សព្ពាបិ ឥមា កបិលវត្ថុវាសិនិយោ ពោធិសត្តស្ស ឱរោធភូតា មហាបជាបតិគោតមិយា សទ្ធិំ និក្ខន្តា ឱភាសគាថាយ ច អរហត្តំ បត្តា ឋបេត្វា សត្តមិំ. សា បន ឱភាសគាថាយ វិនា បគេវ សត្ថុ សន្តិកេ លទ្ធំ ឱវាទំ និស្សាយ វិបស្សនំ ឧស្សុក្កាបេត្វា អរហត្តំ បាបុណិត្វា ឧទានវសេន ‘‘វីរា វីរេហី’’តិ គាថំ អភាសិ. ឥតរាបិ អរហត្តំ បត្វា –

៥. ‘‘តិស្សេ យុញ្ជស្សុ ធម្មេហិ, ខណោ តំ មា ឧបច្ចគា;

ខណាតីតា ហិ សោចន្តិ, និរយម្ហិ សមប្បិតា.

៦. ‘‘ធីរេ និរោធំ ផុសេហិ, សញ្ញាវូបសមំ សុខំ;

អារាធយាហិ និព្ពានំ, យោគក្ខេមមនុត្តរំ.

៧. ‘‘វីរា វីរេហិ ធម្មេហិ, ភិក្ខុនី ភាវិតិន្ទ្រិយា;

ធារេតិ អន្តិមំ ទេហំ, ជេត្វា មារំ សវាហនំ.

៨. ‘‘សទ្ធាយ បព្ពជិត្វាន, មិត្តេ មិត្តរតា ភវ;

ភាវេហិ កុសលេ ធម្មេ, យោគក្ខេមស្ស បត្តិយា.

៩. ‘‘សទ្ធាយ បព្ពជិត្វាន, ភទ្រេ ភទ្ររតា ភវ;

ភាវេហិ កុសលេ ធម្មេ, យោគក្ខេមមនុត្តរំ.

១០. ‘‘ឧបសមេ តរេ ឱឃំ, មច្ចុធេយ្យំ សុទុត្តរំ;

ធារេហិ អន្តិមំ ទេហំ, ជេត្វា មារំ សវាហន’’ន្តិ. – គាថាយោ អភាសិំសុ;

តត្ថ យុញ្ជស្សុ ធម្មេហីតិ សមថវិបស្សនាធម្មេហិ អរិយេហិ ពោធិបក្ខិយធម្មេហិ ច យុញ្ជ យោគំ ករោហិ. ខណោ តំ មា ឧបច្ចគាតិ យោ ឯវំ យោគភាវនំ ន ករោតិ, តំ បុគ្គលំ បតិរូបទេសេ ឧប្បត្តិក្ខណោ, ឆន្នំ អាយតនានំ អវេកល្លក្ខណោ, ពុទ្ធុប្បាទក្ខណោ, សទ្ធាយ បដិលទ្ធក្ខណោ, សព្ពោបិ អយំ ខណោ អតិក្កមតិ នាម. សោ ខណោ តំ មា អតិក្កមិ. ខណាតីតាតិ យេ ហិ ខណំ អតីតា, យេ ច បុគ្គលេ សោ ខណោ អភីតោ, តេ និរយម្ហិ សមប្បិតា ហុត្វា សោចន្តិ, តត្ថ និព្ពត្តិត្វា មហាទុក្ខំ បច្ចនុភវន្តីតិ អត្ថោ.

និរោធំ ផុសេហីតិ កិលេសនិរោធំ ផុស្ស បដិលភ. សញ្ញាវូបសមំ សុខំ, អារាធយាហិ និព្ពានន្តិ កាមសញ្ញាទីនំ បាបសញ្ញានំ ឧបសមនិមិត្តំ អច្ចន្តសុខំ និព្ពានំ អារាធេហិ.

វីរា វីរេហិ ធម្មេហីតិ វីរិយបធានតាយ វីរេហិ តេជុស្សទេហិ អរិយមគ្គធម្មេហិ ភាវិតិន្ទ្រិយា វឌ្ឍិតសទ្ធាទិឥន្ទ្រិយា វីរា ភិក្ខុនី វត្ថុកាមេហិ សវាហនំ កិលេសមារំ ជិនិត្វា អាយតិំ បុនព្ភវាភាវតោ អន្តិមំ ទេហំ ធារេតីតិ ថេរី អញ្ញំ វិយ កត្វា អត្តានំ ទស្សេតិ.

មិត្តេតិ តំ អាលបតិ. មិត្តរតាតិ កល្យាណមិត្តេសុ អភិរតា. តត្ថ សក្ការសម្មានករណតា ហោហិ. ភាវេហិ កុសលេ ធម្មេតិ អរិយមគ្គធម្មេ វឌ្ឍេហិ. យោគក្ខេមស្សាតិ អរហត្តស្ស និព្ពានស្ស ច បត្តិយា អធិគមាយ.

ភទ្រេតិ តំ អាលបតិ. ភទ្ររតាតិ ភទ្រេសុ សីលាទិធម្មេសុ រតា អភិរតា ហោហិ. យោគក្ខេមមនុត្តរន្តិ ចតូហិ យោគេហិ ខេមំ អនុបទ្ទវំ អនុត្តរំ និព្ពានំ, តស្ស បត្តិយា កុសលេ ពោធិបក្ខិយធម្មេ ភាវេហីតិ អត្ថោ.

ឧបសមេតិ តំ អាលបតិ. តរេ ឱឃំ មច្ចុធេយ្យំ សុទុត្តរន្តិ មច្ចុ ឯត្ថ ធីយតីតិ មច្ចុធេយ្យំ, អនុបចិតកុសលសម្ភារេហិ សុដ្ឋុ ទុត្តរន្តិ សុទុត្តរំ, សំសារមហោឃំ តរេ អរិយមគ្គនាវាយ តរេយ្យាសិ. ធារេហិ អន្តិមំ ទេហន្តិ តស្ស តរណេនេវ អន្តិមទេហធរា ហោហីតិ អត្ថោ.

តិស្សាទិថេរីគាថាវណ្ណនា និដ្ឋិតា.

និដ្ឋិតា បឋមវគ្គវណ្ណនា.