៦. កុមារបេតវត្ថុវណ្ណនា

សាវត្ថិ នាម នគរន្តិ ឥទំ សត្ថា ជេតវនេ វិហរន្តោ ទ្វេ បេតេ អារព្ភ កថេសិ. សាវត្ថិយំ កិរ កោសលរញ្ញោ ទ្វេ បុត្តា បាសាទិកា បឋមវយេ ឋិតា យោព្ពនមទមត្តា បរទារកម្មំ កត្វា កាលំ កត្វា បរិខាបិដ្ឋេ បេតា ហុត្វា និព្ពត្តិំសុ. តេ រត្តិយំ ភេរវេន សទ្ទេន បរិទេវិំសុ. មនុស្សា តំ សុត្វា ភីតតសិតា ‘‘ឯវំ កតេ ឥទំ អវមង្គលំ វូបសម្មតី’’តិ ពុទ្ធប្បមុខស្ស ភិក្ខុសង្ឃស្ស មហាទានំ ទត្វា តំ បវត្តិំ ភគវតោ អារោចេសុំ. ភគវា ‘‘ឧបាសកា តស្ស សទ្ទស្ស សវនេន តុម្ហាកំ ន កោចិ អន្តរាយោ’’តិ វត្វា តស្ស ការណំ អាចិក្ខិត្វា តេសំ ធម្មំ ទេសេតុំ –

៧៤៦. ‘‘សាវត្ថិ នាម នគរំ, ហិមវន្តស្ស បស្សតោ;

តត្ថ អាសុំ ទ្វេ កុមារា, រាជបុត្តាតិ មេ សុតំ.

៧៤៧. ‘‘សម្មត្តា រជនីយេសុ, កាមស្សាទាភិនន្ទិនោ;

បច្ចុប្បន្នសុខេ គិទ្ធា, ន តេ បស្សិំសុនាគតំ.

៧៤៨. ‘‘តេ ចុតា ច មនុស្សត្តា, បរលោកំ ឥតោ គតា;

តេធ ឃោសេន្ត្យទិស្សន្តា, បុព្ពេ ទុក្កដមត្តនោ.

៧៤៩. ‘‘ពហូសុ វត សន្តេសុ, ទេយ្យធម្មេ ឧបដ្ឋិតេ;

នាសក្ខិម្ហា ច អត្តានំ, បរិត្តំ កាតុំ សុខាវហំ.

៧៥០. ‘‘កិំ តតោ បាបកំ អស្ស, យំ នោ រាជកុលា ចុតា;

ឧបបន្នា បេត្តិវិសយំ, ខុប្បិបាសសមប្បិតា.

៧៥១. ‘‘សាមិនោ ឥធ ហុត្វាន, ហោន្តិ អសាមិនោ តហិំ;

ភមន្តិ ខុប្បិបាសាយ, មនុស្សា ឧន្នតោនតា.

៧៥២. ‘‘ឯតមាទីនវំ ញត្វា, ឥស្សរមទសម្ភវំ;

បហាយ ឥស្សរមទំ, ភវេ សគ្គគតោ នរោ;

កាយស្ស ភេទា សប្បញ្ញោ, សគ្គំ សោ ឧបបជ្ជតី’’តិ – គាថា អភាសិ;

៧៤៦. តត្ថ ឥតិ មេ សុតន្តិ ន កេវលំ អត្តនោ ញាណេន ទិដ្ឋមេវ, អថ ខោ លោកេ បាកដភាវេន ឯវំ មយា សុតន្តិ អត្ថោ.

៧៤៧. កាមស្សាទាភិនន្ទិនោតិ កាមគុណេសុ អស្សាទវសេន អភិនន្ទនសីលា. បច្ចុប្បន្នសុខេ គិទ្ធាតិ វត្តមានសុខមត្តេ គិទ្ធា គថិតា ហុត្វា. ន តេ បស្សិំសុនាគតន្តិ ទុច្ចរិតំ បហាយ សុចរិតំ ចរិត្វា អនាគតំ អាយតិំ ទេវមនុស្សេសុ លទ្ធព្ពំ សុខំ តេ ន ចិន្តេសុំ.

៧៤៨. តេធ ឃោសេន្ត្យទិស្សន្តាតិ តេ បុព្ពេ រាជបុត្តភូតា បេតា ឥធ សាវត្ថិយា សមីបេ អទិស្សមានរូបា ឃោសេន្តិ កន្ទន្តិ. កិំ កន្ទន្តីតិ អាហ ‘‘បុព្ពេ ទុក្កដមត្តនោ’’តិ.

៧៤៩. ឥទានិ តេសំ កន្ទនស្ស ការណំ ហេតុតោ ច ផលតោ ច វិភជិត្វា ទស្សេតុំ ‘‘ពហូសុ វត សន្តេសូ’’តិអាទិ វុត្តំ.

តត្ថ ពហូសុ វត សន្តេសូតិ អនេកេសុ ទក្ខិណេយ្យេសុ វិជ្ជមានេសុ. ទេយ្យធម្មេ ឧបដ្ឋិតេតិ អត្តនោ សន្តកេ ទាតព្ពទេយ្យធម្មេបិ សមីបេ ឋិតេ, លព្ភមានេតិ អត្ថោ. បរិត្តំ សុខាវហន្តិ អប្បមត្តកម្បិ អាយតិំ សុខាវហំ បុញ្ញំ កត្វា អត្តានំ សោត្ថិំ និរុបទ្ទវំ កាតុំ នាសក្ខិម្ហា វតាតិ យោជនា.

៧៥០. កិំ តតោ បាបកំ អស្សាតិ តតោ បាបកំ លាមកំ នាម កិំ អញ្ញំ អស្ស សិយា. យំ នោ រាជកុលា ចុតាតិ យេន បាបកម្មេន មយំ រាជកុលតោ ចុតា ឥធ បេត្តិវិសយំ ឧបបន្នា បេតេសុ និព្ពត្តា ខុប្បិបាសសមប្បិតា វិចរាមាតិ អត្ថោ.

៧៥១. សាមិនោ ឥធ ហុត្វានាតិ ឥធ ឥមស្មិំ លោកេ យស្មិំយេវ ឋានេ បុព្ពេ សាមិនោ ហុត្វា វិចរន្តិ, តហិំ តស្មិំយេវ ឋានេ ហោន្តិ អស្សាមិនោ. មនុស្សា ឧន្នតោនតាតិ មនុស្សកាលេ សាមិនោ ហុត្វា កាលកតា កម្មវសេន ឱនតា ភមន្តិ ខុប្បិបាសាយ, បស្ស សំសារបកតិន្តិ ទស្សេតិ.

៧៥២. ឯតមាទីនវំ ញត្វា, ឥស្សរមទសម្ភវន្តិ ឯតំ ឥស្សរិយមទវសេន សម្ភូតំ អបាយូបបត្តិសង្ខាតំ អាទីនវំ ទោសំ ញត្វា បហាយ ឥស្សរិយមទំ បុញ្ញប្បសុតោ ហុត្វា. ភវេ សគ្គគតោ នរោតិ សគ្គំ ទេវលោកំ គតោយេវ ភវេយ្យ.

ឥតិ សត្ថា តេសំ បេតានំ បវត្តិំ កថេត្វា តេហិ មនុស្សេហិ កតំ ទានំ តេសំ បេតានំ ឧទ្ទិសាបេត្វា សម្បត្តបរិសាយ អជ្ឈាសយានុរូបំ ធម្មំ ទេសេសិ. សា ទេសនា មហាជនស្ស សាត្ថិកា អហោសីតិ.

កុមារបេតវត្ថុវណ្ណនា និដ្ឋិតា.