៧. សត្តបុត្តខាទកបេតិវត្ថុវណ្ណនា

នគ្គា ទុព្ពណ្ណរូបាសីតិ ឥទំ សត្ថរិ សាវត្ថិយំ វិហរន្តេ សត្តបុត្តខាទកបេតិំ អារព្ភ វុត្តំ. សាវត្ថិយា កិរ អវិទូរេ អញ្ញតរស្មិំ គាមកេ អញ្ញតរស្ស ឧបាសកស្ស ទ្វេ បុត្តា អហេសុំ – បឋមវយេ ឋិតា រូបសម្បន្នា សីលាចារេន សមន្នាគតា. តេសំ មាតា ‘‘បុត្តវតី អហ’’ន្តិ បុត្តពលេន ភត្តារំ អតិមញ្ញតិ. សោ ភរិយាយ អវមានិតោ និព្ពិន្នមានសោ អញ្ញំ កញ្ញំ អានេសិ. សា នចិរស្សេវ គព្ភិនី អហោសិ. អថស្ស ជេដ្ឋភរិយា ឥស្សាបកតា អញ្ញតរំ វេជ្ជំ អាមិសេន ឧបលាបេត្វា តេន តស្សា តេមាសិកំ គព្ភំ បាតេសិ. អថ សា ញាតីហិ ច ភត្តារា ច ‘‘តយា ឥមិស្សា គព្ភោ បាតិតោ’’តិ បុដ្ឋា ‘‘នាហំ បាតេមី’’តិ មុសា វត្វា តេហិ អសទ្ទហន្តេហិ ‘‘សបថំ ករោហី’’តិ វុត្តា ‘‘សាយំ បាតំ សត្ត សត្ត បុត្តេ វិជាយិត្វា បុត្តមំសានិ ខាទាមិ, និច្ចំ ទុគ្គន្ធា ច មក្ខិកាបរិកិណ្ណា ច ភវេយ្យ’’ន្តិ សបថំ អកាសិ.

សា អបរេន សមយេន កាលំ កត្វា តស្ស គព្ភបាតនស្ស មុសាវាទស្ស ច ផលេនេវ បេតយោនិយំ និព្ពត្តិត្វា បុត្តនយេន បុត្តមំសានិ ខាទន្តី តស្សេវ គាមស្ស អវិទូរេ វិចរតិ. តេន ច សមយេន សម្ពហុលា ថេរា គាមកាវាសេ វុត្ថវស្សា ភគវន្តំ ទស្សនាយ សាវត្ថិំ អាគច្ឆន្តា តស្ស គាមស្ស អវិទូរេ ឯកស្មិំ បទេសេ រត្តិយំ វាសំ កប្បេសុំ. អថ សា បេតី តេសំ ថេរានំ អត្តានំ ទស្សេសិ. តំ មហាថេរោ គាថាយ បុច្ឆិ –

៣៥. ‘‘នគ្គា ទុព្ពណ្ណរូបាសិ, ទុគ្គន្ធា បូតិ វាយសិ;

មក្ខិកាហិ បរិកិណ្ណា, កា នុ ត្វំ ឥធ តិដ្ឋសី’’តិ.

សា ថេរេន បុដ្ឋា តីហិ គាថាហិ បដិវចនំ អទាសិ –

៣៦. ‘‘អហំ ភទន្តេ បេតីម្ហិ, ទុគ្គតា យមលោកិកា;

បាបកម្មំ ករិត្វាន, បេតលោកំ ឥតោ គតា.

៣៧. ‘‘កាលេន សត្ត បុត្តានិ, សាយំ សត្ត បុនាបរេ;

វិជាយិត្វាន ខាទាមិ, តេបិ នា ហោន្តិ មេ អលំ.

៣៨. ‘‘បរិឌយ្ហតិ ធូមាយតិ, ខុទាយ ហទយំ មម;

និព្ពុតិំ នាធិគច្ឆាមិ, អគ្គិទឌ្ឍាវ អាតបេ’’តិ.

៣៨. តត្ថ និព្ពុតិន្តិ ខុប្បិបាសាទុក្ខស្ស វូបសមំ. នាធិគច្ឆាមីតិ ន លភាមិ. អគ្គិទឌ្ឍាវ អាតបេតិ អតិឧណ្ហអាតបេ អគ្គិនា ឌយ្ហមានា វិយ និព្ពុតិំ នាធិគច្ឆាមីតិ យោជនា.

តំ សុត្វា មហាថេរោ តាយ កតកម្មំ បុច្ឆន្តោ –

៣៩. ‘‘កិំ នុ កាយេន វាចាយ, មនសា ទុក្កដំ កតំ;

កិស្សកម្មវិបាកេន, បុត្តមំសានិ ខាទសី’’តិ. – គាថមាហ;

អថ សា បេតី អត្តនោ បេតលោកូបបត្តិញ្ច បុត្តមំសខាទនការណញ្ច កថេន្តី –

៤០. ‘‘អហូ មយ្ហំ ទុវេ បុត្តា, ឧភោ សម្បត្តយោព្ពនា;

សាហំ បុត្តពលូបេតា, សាមិកំ អតិមញ្ញិសំ.

៤១. ‘‘តតោ មេ សាមិកោ កុទ្ធោ, សបតិំ មយ្ហមានយិ;

សា ច គព្ភំ អលភិត្ថ, តស្សា បាបំ អចេតយិំ.

៤២. ‘‘សាហំ បទុដ្ឋមនសា, អករិំ គព្ភបាតនំ;

តស្ស តេមាសិកោ គព្ភោ, បូតិលោហិតកោ បតិ.

៤៣. ‘‘តទស្សា មាតា កុបិតា, មយ្ហំ ញាតី សមានយិ;

សបថញ្ច មំ ការេសិ, បរិភាសាបយី ច មំ.

៤៤. ‘‘សាហំ ឃោរញ្ច សបថំ, មុសាវាទំ អភាសិសំ;

‘បុត្តមំសានិ ខាទាមិ, សចេ តំ បកតំ មយា’.

៤៥. ‘‘តស្ស កម្មស្ស វិបាកេន, មុសាវាទស្ស ចូភយំ;

បុត្តមំសានិ ខាទាមិ, បុព្ពលោហិតមក្ខិតា’’តិ. – ឥមា គាថា អភាសិ;

៤០-៤៥. តត្ថ បុត្តពលូបេតាតិ បុត្តពលេន ឧបេតា, បុត្តានំ វសេន លទ្ធពលា. អតិមញ្ញិសន្តិ អតិក្កមិត្វា មញ្ញិំ អវមញ្ញិំ. បូតិលោហិតកោ បតីតិ កុណបលោហិតំ ហុត្វា គព្ភោ បរិបតិ. សេសំ សព្ពំ អនន្តរសទិសមេវ. តត្ថ អដ្ឋ ថេរា, ឥធ សម្ពហុលា. តត្ថ បញ្ច បុត្តា, ឥធ សត្តាតិ អយមេវ វិសេសោតិ.

សត្តបុត្តខាទកបេតិវត្ថុវណ្ណានា និដ្ឋិតា.