១០. វេវចនហារសម្បាតវណ្ណនា

៧២. ‘‘មានសំ ហទយំ បណ្ឌរំ វិញ្ញាណំ វិញ្ញាណក្ខន្ធោ មនោវិញ្ញាណធាតូ’’តិ (ធ. ស. ៦) ច ចិត្តស្ស វេវចនំ. ‘‘តក្កោ វិតក្កោ សង្កប្បោ អប្បនា ព្យប្បនា ចេតសោ អភិនិរោបនា’’តិ ច សម្មាសង្កប្បស្ស. ‘‘បញ្ញា បជាននា វិចយោ បវិចយោ’’តិអាទិនា (ធ. ស. ១៦) សម្មាទិដ្ឋិយា. ‘‘ថិនំ ថិយនា ថិយិតត្តំ ចិត្តស្ស អកល្លតា អកម្មញ្ញតា ឱនាហោ បរិនាហោ អន្តោសង្កោចោ’’តិ ថិនស្ស. ‘‘អកល្លតា អកម្មញ្ញតា កាយាលសិយំ សុប្យំ សុប្យនា សុបិតត្ត’’ន្តិ (ធ. ស. ១១៦៣) មិទ្ធស្ស. ‘‘ភិក្ខកោ ភិក្ខូ’’តិអាទិនា (បារា. ៤៥) ភិក្ខុបទស្ស. ‘‘ទុគ្គតិ អបាយោ វិនិបាតោ វដ្ដទុក្ខំ សំសារោ’’តិអាទិនា ទុគ្គតិយា វេវចនំ វេទិតព្ពំ.

វេវចនហារសម្បាតវណ្ណនា និដ្ឋិតា.