៩. ទុតិយនកុហនសុត្តវណ្ណនា

៣៦. នវមេ អភិញ្ញត្ថន្តិ កុសលាទិវិភាគេន ខន្ធាទិវិភាគេន ច សព្ពធម្មេ អភិវិសិដ្ឋេន ញាណេន អវិបរីតតោ ជាននត្ថំ. បរិញ្ញត្ថន្តិ តេភូមកធម្មេ ‘‘ឥទំ ទុក្ខ’’ន្តិអាទិនា បរិជាននត្ថំ សមតិក្កមនត្ថញ្ច. តត្ថ អភិញ្ញេយ្យអភិជាននា ចតុសច្ចវិសយា. បរិញ្ញេយ្យបរិជាននា បន យទិបិ ទុក្ខសច្ចវិសយា, បហានសច្ឆិកិរិយាភាវនាភិសមយេហិ បន វិនា ន បវត្តតីតិ បហានាទយោបិ ឥធ គហិតាតិ វេទិតព្ពំ. សេសំ អនន្តរសុត្តេ វុត្តត្ថមេវ.

នវមសុត្តវណ្ណនា និដ្ឋិតា.