២. មារវត្ថុ

សុសុខំ វត ជីវាមាតិ ឥមំ ធម្មទេសនំ សត្ថា បញ្ចសាលាយ ព្រាហ្មណគាមេ វិហរន្តោ មារំ អារព្ភ កថេសិ.

ឯកទិវសញ្ហិ សត្ថា បញ្ចសតានំ កុមារិកានំ សោតាបត្តិមគ្គស្សូបនិស្សយំ ទិស្វា តំ គាមំ ឧបនិស្សាយ វិហាសិ. តាបិ កុមារិកាយោ ឯកស្មិំ នក្ខត្តទិវសេ នទិំ គន្ត្វា ន្ហត្វា អលង្កតបដិយត្តា គាមាភិមុខិយោ បាយិំសុ. សត្ថាបិ តំ គាមំ បវិសិត្វា បិណ្ឌាយ ចរតិ. អថ មារោ សកលគាមវាសីនំ សរីរេ អធិមុច្ចិត្វា យថា សត្ថា កដច្ឆុភត្តមត្តម្បិ ន លភតិ, ឯវំ កត្វា យថាធោតេន បត្តេន និក្ខមន្តំ សត្ថារំ គាមទ្វារេ ឋត្វា អាហ – ‘‘អបិ, សមណ, បិណ្ឌបាតំ លភិត្ថា’’តិ. ‘‘កិំ បន ត្វំ, បាបិម, តថា អកាសិ, យថាហំ បិណ្ឌំ ន លភេយ្យ’’ន្តិ? ‘‘តេន ហិ, ភន្តេ, បុន បវិសថា’’តិ. ឯវំ កិរស្ស អហោសិ – ‘‘សចេ បុន បវិសតិ, សព្ពេសំ សរីរេ អធិមុច្ចិត្វា ឥមស្ស បុរតោ បាណិំ បហរិត្វា ហស្សកេឡិំ ករិស្សាមី’’តិ. តស្មិំ ខណេ តា កុមារិកាយោ គាមទ្វារំ បត្វា សត្ថារំ ទិស្វា វន្ទិត្វា ឯកមន្តំ អដ្ឋំសុ. មារោបិ សត្ថារំ អាហ – ‘‘អបិ, ភន្តេ, បិណ្ឌំ អលភមានា ជិឃច្ឆាទុក្ខេន បីឡិតត្ថា’’តិ. សត្ថា ‘‘អជ្ជ មយំ, បាបិម, កិញ្ចិ អលភិត្វាបិ អាភស្សរលោកេ មហាព្រហ្មានោ វិយ បីតិសុខេនេវ វីតិនាមេស្សាមា’’តិ វត្វា ឥមំ គាថមាហ –

២០០. ‘‘សុសុខំ វត ជីវាម, យេសំ នោ នត្ថិ កិញ្ចនំ;

បីតិភក្ខា ភវិស្សាម, ទេវា អាភស្សរា យថា’’តិ.

តត្ថ យេសំ នោតិ យេសំ អម្ហាកំ បលិពុជ្ឈនត្ថេន រាគាទីសុ កិញ្ចនេសុ ឯកម្បិ កិញ្ចនំ នត្ថិ. បីតិភក្ខាតិ យថា អាភស្សរា ទេវា បីតិភក្ខា ហុត្វា បីតិសុខេនេវ វីតិនាមេន្តិ, ឯវំ មយម្បិ, បាបិម, កិញ្ចិ អលភិត្វា បីតិភក្ខា ភវិស្សាមាតិ អត្ថោ.

ទេសនាវសានេ បញ្ចសតាបិ កុមារិកាយោ សោតាបត្តិផលេ បតិដ្ឋហិំសូតិ.

មារវត្ថុ ទុតិយំ.