អរិយវាសទសកវណ្ណនា

៣៤៨. អរិយវាសាតិ អរិយា ឯវ វសិំសុ វសន្តិ វសិស្សន្តិ ឯតេសូតិ អរិយវាសា. បញ្ចង្គវិប្បហីនោតិ បញ្ចហិ អង្គេហិ វិប្បយុត្តោវ ហុត្វា ខីណាសវោ អវសិ វសតិ វសិស្សតីតិ តស្មា អយំ បញ្ចង្គវិប្បហីនតា, អរិយស្ស វាសត្តា អរិយវាសោតិ វុត្តោ. ឯស នយោ សព្ពត្ថ.

ឯវំ ខោ, អាវុសោ, ភិក្ខុ ឆឡង្គសមន្នាគតោ ហោតីតិ ឆឡង្គុបេក្ខាយ សមន្នាគតោ ហោតិ. ឆឡង្គុបេក្ខា នាម កេតិ? ញាណាទយោ. ‘‘ញាណ’’ន្តិ វុត្តេ កិរិយតោ ចត្តារិ ញាណសម្បយុត្តចិត្តានិ លព្ភន្តិ. ‘‘សតតវិហារោ’’តិ វុត្តេ អដ្ឋ មហាចិត្តានិ. ‘‘រជ្ជនទុស្សនំ នត្ថី’’តិ វុត្តេ ទស ចិត្តានិ លព្ភន្តិ. សោមនស្សំ អាសេវនវសេន លព្ភតិ.

សតារក្ខេន ចេតសាតិ ខីណាសវស្ស ហិ តីសុ ទ្វារេសុ សព្ពកាលំ សតិ អារក្ខកិច្ចំ សាធេតិ. តេនេវស្ស ‘‘ចរតោ ច តិដ្ឋតោ ច សុត្តស្ស ច ជាគរស្ស ច សតតំ សមិតំ ញាណទស្សនំ បច្ចុបដ្ឋិតំ ហោតី’’តិ វុច្ចតិ.

បុថុសមណព្រាហ្មណានន្តិ ពហូនំ សមណព្រាហ្មណានំ. ឯត្ថ ច សមណាតិ បព្ពជ្ជុបគតា. ព្រាហ្មណាតិ ភោវាទិនោ. បុថុបច្ចេកសច្ចានីតិ ពហូនិ បាដេក្កសច្ចានិ, ឥទមេវ ទស្សនំ សច្ចំ, ឥទមេវ ទស្សនំ សច្ចន្តិ ឯវំ បាដិយេក្កំ គហិតានិ ពហូនិ សច្ចានីតិ អត្ថោ. នុន្នានីតិ និហតានិ. បណុន្នានីតិ សុដ្ឋុ និហតានិ. ចត្តានីតិ វិស្សដ្ឋានិ. វន្តានីតិ វមិតានិ. មុត្តានីតិ ឆិន្នពន្ធនានិ កតានិ. បហីនានីតិ បជហិតានិ. បដិនិស្សដ្ឋានីតិ យថា ន បុន ចិត្តំ អារុហន្តិ, ឯវំ បដិនិស្សជ្ជិតានិ. សព្ពានេវ តានិ គហិតគ្គហណស្ស វិស្សដ្ឋភាវវេវចនានិ.

សមវយសដ្ឋេសនោតិ ឯត្ថ អវយាតិ អនូនា. សដ្ឋាតិ វិស្សដ្ឋា. សម្មា អវយា សដ្ឋា ឯសនា អស្សាតិ សមវយសដ្ឋេសនោ. សម្មា វិស្សដ្ឋសព្ពឯសនោតិ អត្ថោ. រាគា ចិត្តំ វិមុត្តន្តិអាទីហិ មគ្គស្ស កិច្ចនិប្ផត្តិ កថិតា.

រាគោ មេ បហីនោតិអាទីហិ បច្ចវេក្ខណាយ ផលំ កថិតំ.