ពោធិសត្តបព្ពជ្ជាវណ្ណនា

៥៤. អថ ខោ, ភិក្ខវេតិ – ‘‘បព្ពជិតស្ស សាធុ ធម្មចរិយា’’តិអាទីនិ ច អញ្ញញ្ច ពហុំ មហាជនកាយេន រក្ខិយមានស្ស បុត្តទារសម្ពាធេ ឃរេ វសតោ អាទីនវបដិសំយុត្តញ្ចេវ មិគភូតេន ចេតសា យថាសុខំ វនេ វសតោ បព្ពជិតស្ស វិវេកានិសំសបដិសំយុត្តញ្ច ធម្មិំ កថំ សុត្វា បព្ពជិតុកាមោ ហុត្វា – អថ ខោ, ភិក្ខវេ, វិបស្សី កុមារោ សារថិំ អាមន្តេសិ.

ឥមានិ ចត្តារិ ទិស្វា បព្ពជិតំ នាម សព្ពពោធិសត្តានំ វំសោវ តន្តិយេវ បវេណីយេវ. អញ្ញេបិ ច ពោធិសត្តា យថា អយំ វិបស្សី កុមារោ, ឯវំ ចិរស្សំ ចិរស្សំ បស្សន្តិ. អម្ហាកំ បន ពោធិសត្តោ ចត្តារិបិ ឯកទិវសំយេវ ទិស្វា មហាភិនិក្ខមនំ និក្ខមិត្វា អនោមានទីតីរេ បព្ពជិតោ. តេនេវ រាជគហំ បត្វា តត្ថ រញ្ញា ពិម្ពិសារេន – ‘‘កិមត្ថំ, បណ្ឌិត, បព្ពជិតោសីតិ’’ បុដ្ឋោ អាហ –

‘‘ជិណ្ណញ្ច ទិស្វា ទុខិតញ្ច ព្យាធិតំ,

មតញ្ច ទិស្វា គតមាយុសង្ខយំ;

កាសាយវត្ថំ បព្ពជិតញ្ច ទិស្វា,

តស្មា អហំ បព្ពជិតោម្ហិ រាជា’’តិ.