ជិណ្ណបុរិសវណ្ណនា

៤៣. ទុតិយភាណវារេ គោបានសិវង្កន្តិ គោបានសី វិយ វង្កំ. ភោគ្គន្តិ ខន្ធេ, កដិយំ, ជាណូសូតិ តីសុ ឋានេសុ ភោគ្គវង្កំ. ទណ្ឌបរាយនន្តិ ទណ្ឌគតិកំ ទណ្ឌបដិសរណំ. អាតុរន្តិ ជរាតុរំ. គតយោព្ពនន្តិ អតិក្កន្តយោព្ពនំ បច្ឆិមវយេ ឋិតំ. ទិស្វាតិ អឌ្ឍយោជនប្បមាណេន ពលកាយេន បរិវុតោ សុសំវិហិតារក្ខោបិ គច្ឆន្តោ យទា រថោ បុរតោ ហោតិ, បច្ឆា ពលកាយោ, តាទិសេ ឱកាសេ សុទ្ធាវាសខីណាសវព្រហ្មេហិ អត្តនោ អានុភាវេន រថស្ស បុរតោវ ទស្សិតំ, តំ បុរិសំ បស្សិត្វា. សុទ្ធាវាសា កិរ – ‘‘មហាបុរិសោ បង្កេ គជោ វិយ បញ្ចសុ កាមគុណេសុ លគ្គោ, សតិមស្ស ឧប្បាទេស្សាមា’’តិ តំ ទស្សេសុំ. ឯវំ ទស្សិតញ្ច តំ ពោធិសត្តោ ចេវ បស្សតិ សារថិ ច. ព្រហ្មានោ ហិ ពោធិសត្តស្ស អប្បមាទត្ថំ សារថិស្ស ច កថាសល្លាបត្ថំ តំ ទស្សេសុំ. កិំ បនេសោតិ ‘‘ឯសោ ជិណ្ណោតិ កិំ វុត្តំ ហោតិ, នាហំ, ភោ ឥតោ បុព្ពេ ឯវរូបំ អទ្ទស’’ន្តិ បុច្ឆិ.

តេន ហីតិ យទិ មយ្ហម្បិ ឯវរូបេហិ កេសេហិ ឯវរូបេន ច កាយេន ភវិតព្ពំ, តេន ហិ សម្ម សារថិ. អលំ ទានជ្ជ ឧយ្យានភូមិយាតិ – ‘‘អជ្ជ ឧយ្យានភូមិំ បស្សិស្សាមា’’តិ គច្ឆាម, អលំ តាយ ឧយ្យានភូមិយាតិ សំវិគ្គហទយោ សំវេគានុរូបមាហ. អន្តេបុរំ គតោតិ ឥត្ថិជនំ វិស្សជ្ជេត្វា សិរិគព្ភេ ឯកកោវ និសិន្នោ. យត្រ ហិ នាមាតិ យាយ ជាតិយា សតិ ជរា បញ្ញាយតិ, សា ជាតិ ធិរត្ថុ ធិក្កតា អត្ថុ, ជិគុច្ឆាមេតំ ជាតិន្តិ, ជាតិយា មូលំ ខណន្តោ និសីទិ, បឋមេន សល្លេន ហទយេ វិទ្ធោ វិយ.

៤៥. សារថិំ អាមន្តាបេត្វាតិ រាជា កិរ នេមិត្តកេហិ កថិតកាលតោ បដ្ឋាយ ឱហិតសោតោ វិចរតិ, សោ ‘‘កុមារោ ឧយ្យានំ គច្ឆន្តោ អន្តរាមគ្គេ និវត្តោ’’តិ សុត្វា សារថិំ អាមន្តាបេសិ. មា ហេវ ខោតិអាទីសុ រជ្ជំ ការេតុ, មា បព្ពជតុ, ព្រាហ្មណានំ វចនំ មា សច្ចំ ហោតូតិ ឯវំ ចិន្តេសីតិ អត្ថោ.