អន្តានន្តវាទវណ្ណនា

៥៣. អន្តានន្តិកាតិ អន្តានន្តវាទា, អន្តំ វា អនន្តំ វា អន្តានន្តំ វា នេវន្តានានន្តំ វា អារព្ភ បវត្តវាទាតិ អត្ថោ.

៥៤-៦០. អន្តសញ្ញី លោកស្មិំ វិហរតីតិ បដិភាគនិមិត្តំ ចក្កវាឡបរិយន្តំ អវឌ្ឍេត្វា តំ – ‘‘លោកោ’’តិ គហេត្វា អន្តសញ្ញី លោកស្មិំ វិហរតិ, ចក្កវាឡបរិយន្តំ កត្វា វឌ្ឍិតកសិណោ បន អនន្តសញ្ញី ហោតិ, ឧទ្ធមធោ អវឌ្ឍេត្វា បន តិរិយំ វឌ្ឍេត្វា ឧទ្ធមធោ អន្តសញ្ញី, តិរិយំ អនន្តសញ្ញី. តក្កីវាទោ វុត្តនយេនេវ វេទិតព្ពោ. ឥមេ ចត្តារោបិ អត្តនា ទិដ្ឋបុព្ពានុសារេនេវ ទិដ្ឋិយា គហិតត្តា បុព្ពន្តកប្បិកេសុ បវិដ្ឋា.