ផស្សបច្ចយវារវណ្ណនា

១១៨-១៣០. បុន – ‘‘តត្រ, ភិក្ខវេ, យេ តេ សមណព្រាហ្មណា សស្សតវាទា’’តិអាទិ បរម្បរបច្ចយទស្សនត្ថំ អារទ្ធំ. តត្ថ តទបិ ផស្សបច្ចយាតិ យេន ទិដ្ឋិអស្សាទេន ទិដ្ឋិសុខេន ទិដ្ឋិវេទយិតេន តេ សោមនស្សជាតា សស្សតំ អត្តានញ្ច លោកញ្ច បញ្ញបេន្តិ ចតូហិ វត្ថូហិ, តទបិ តណ្ហាទិដ្ឋិបរិផន្ទិតំ វេទយិតំ ផស្សបច្ចយាតិ ទស្សេតិ. ឯស នយោ សព្ពត្ថ.

១៣១-១៤៣. ឥទានិ តស្ស បច្ចយស្ស ទិដ្ឋិវេទយិតេ ពលវភាវទស្សនត្ថំ បុន – ‘‘តត្រ, ភិក្ខវេ, យេ តេ សមណព្រាហ្មណា សស្សតវាទា’’តិអាទិមាហ. តត្ថ តេ វត អញ្ញត្រ ផស្សាតិ តេ វត សមណព្រាហ្មណា តំ វេទយិតំ វិនា ផស្សេន បដិសំវេទិស្សន្តីតិ ការណមេតំ នត្ថីតិ. យថា ហិ បតតោ គេហស្ស ឧបត្ថម្ភនត្ថាយ ថូណា នាម ពលវបច្ចយោ ហោតិ, ន តំ ថូណាយ អនុបត្ថម្ភិតំ ឋាតុំ សក្កោតិ, ឯវមេវ ផស្សោបិ វេទនាយ ពលវបច្ចយោ, តំ វិនា ឥទំ ទិដ្ឋិវេទយិតំ នត្ថីតិ ទស្សេតិ. ឯស នយោ សព្ពត្ថ.