៣. បញ្ហាបុច្ឆកវណ្ណនា

៥០៤. បញ្ហាបុច្ឆកេ បាឡិអនុសារេនេវ មគ្គង្គានំ កុសលាទិភាវោ វេទិតព្ពោ. អារម្មណត្តិកេសុ បន សព្ពានិបេតានិ អប្បមាណំ និព្ពានំ អារព្ភ បវត្តិតោ អប្បមាណារម្មណានេវ, ន មគ្គារម្មណានិ. នេវ ហិ មគ្គោ ន ផលំ មគ្គំ អារម្មណំ ករោតិ. សហជាតហេតុវសេន បនេត្ថ កុសលានិ មគ្គហេតុកានិ; វីរិយំ វា វីមំសំ វា ជេដ្ឋកំ កត្វា មគ្គភាវនាកាលេ មគ្គាធិបតីនិ; ឆន្ទចិត្តជេដ្ឋិកាយ មគ្គភាវនាយ ន វត្តព្ពានិ មគ្គាធិបតីនីតិ; ផលកាលេបិ ន វត្តព្ពានេវ.

អតីតាទីសុ ឯការម្មណភាវេនបិ ន វត្តព្ពានិ; និព្ពានស្ស បន ពហិទ្ធាធម្មត្តា ពហិទ្ធារម្មណានិ នាម ហោន្តីតិ ឯវមេតស្មិំ បញ្ហាបុច្ឆកេបិ និព្ពត្តិតលោកុត្តរានេវ មគ្គង្គានិ កថិតានិ. សម្មាសម្ពុទ្ធេន ហិ សុត្តន្តភាជនីយស្មិំយេវ លោកិយលោកុត្តរានិ មគ្គង្គានិ កថិតានិ; អភិធម្មភាជនីយេ បន បញ្ហាបុច្ឆកេ ច លោកុត្តរានេវាតិ ឯវមយំ មគ្គវិភង្គោបិ តេបរិវដ្ដំ នីហរិត្វាវ ភាជេត្វា ទស្សិតោតិ.

សម្មោហវិនោទនិយា វិភង្គដ្ឋកថាយ

មគ្គង្គវិភង្គវណ្ណនា និដ្ឋិតា.