៦. ទុកទុកបដ្ឋានវណ្ណនា

ទុកទុកបដ្ឋានេបិ ហេតុសហេតុកំ ធម្មំ បដិច្ច ហេតុសហេតុកោ ធម្មោ ឧប្បជ្ជតិ ហេតុបច្ចយាតិ បញ្ហុទ្ធារវសេនេវ សង្ខេបតោ ទេសនា កតា. តត្ថ ហេតុទុកំ សហេតុកទុកាទីហិ, សហេតុកទុកាទីនិ ច តេន សទ្ធិំ យោជិតានិ. ឯកេកំ បន ទុកំ សេសេហិ, សេសា ច តេហិ សទ្ធិំ បដិបាដិយា យោជេតព្ពា. ឥទញ្ហិ ទុកទុកបដ្ឋានំ នាម ‘ទុកេសុយេវ ទុកេ បក្ខិបិត្វា’ ទេសិតំ. តេនេត្ថ សព្ពទុកេហិ សទ្ធិំ សព្ពទុកានំ យោជនា វេទិតព្ពា. បាឡិ បន សង្ខិត្តា. យេន យេន ច បទេន សទ្ធិំ យំ យំ បទំ យោជនំ ន គច្ឆតិ, តំ តំ ហាបេត្វាវ ទេសនា កតាតិ.

ទុកទុកបដ្ឋានវណ្ណនា.

ឯត្តាវតា –

តិកញ្ច បដ្ឋានវរំ ទុកុត្តមំ,

ទុកំ តិកញ្ចេវ តិកំ ទុកញ្ច;

តិកំ តិកញ្ចេវ ទុកំ ទុកញ្ច,

ឆ អនុលោមម្ហិ នយា សុគម្ភីរាតិ. –

អដ្ឋកថាយំ វុត្តគាថាយ ទីបិតា. ធម្មានុលោមបដ្ឋានេ ឆ នយា និទ្ទិដ្ឋា ហោន្តិ. បច្ចយវសេន បនេត្ថ ឯកេកស្មិំ បដ្ឋានេ អនុលោមាទយោ ចត្តារោ ចត្តារោ នយាតិ ឯកេន បរិយាយេន ចតុវីសតិនយបដិមណ្ឌិតំ អនុលោមបដ្ឋានំយេវ វេទិតព្ពំ.