១០. ទសកនិទ្ទេសវណ្ណនា

២០៩. ទសកនិទ្ទេសេ – ឥធាតិ កាមាវចរភូមិយំ. កាមាវចរភូមិយញ្ហិ សត្តក្ខត្តុបរមាទីនំ កាមាវចរភូមិយញ្ញេវ និដ្ឋា ហោតិ. កាមាវចរត្តភាវេនេវ អរហត្តប្បត្តិ ច អនុបាទិសេសនិព្ពានប្បត្តិ ច ហោតីតិ អត្ថោ.

ឥធ វិហាយាតិ ឥធ កាមាវចរេ អត្តភាវេ វិហាយ សុទ្ធាវាសត្តភាវេ ឋិតានំ និដ្ឋា ហោតីតិ អត្ថោ. អន្តរាបរិនិព្ពាយិអាទយោ ហិ ឥធ អនាគាមិផលំ បត្វា ឥតោ ចុតា សុទ្ធាវាសេសុ ឧប្បជ្ជិត្វា តេន អត្តភាវេន អរហត្តញ្ចេវ អនុបាទិសេសនិព្ពានធាតុញ្ច បាបុណន្តិ. តេន វុត្តំ – ‘‘ឥមេសំ បញ្ចន្នំ ឥធ វិហាយ និដ្ឋា’’តិ.

ទសកនិទ្ទេសវណ្ណនា.

និគមនកថា

ឯត្តាវតា ច –

យំ វេ បុគ្គលបញ្ញត្តិំ, លោកេ អប្បដិបុគ្គលោ;

នាតិសង្ខេបតោ សត្ថា, ទេសេសិ តិទសាលយេ.

តស្សា អដ្ឋកថញ្ចេវ, ទីបភាសាយ សង្ខតំ;

អាគមដ្ឋកថាយោ ច, ឱគាហេត្វា អសេសតោ.

សុវិភត្តោ អសំកិណ្ណោ, យោ យោ អត្ថោ យហិំ យហិំ;

តតោ តតោ តំ គហេត្វា, បហាយ អតិវិត្ថារំ.

វិសុទ្ធិមគ្គេ យំ វុត្តំ, តំ អនាទាយ សង្ខតា;

នាតិសង្ខេបវិត្ថារ-នយេនដ្ឋកថា អយំ.

តំ ឯតំ សត្តមត្តេហិ, ភាណវារេហិ តន្តិយា;

ចិរដ្ឋិតត្ថំ ធម្មស្ស, សង្ខរោន្តេន យំ មយា.

សម្បត្តំ កុសលំ តេន, សទ្ធម្មំ សុខុមំ សិវំ;

ឱលោកេន្តុ វិសុទ្ធេន, បាណយោ ធម្មចក្ខុនាតិ.

បុគ្គលបញ្ញត្តិ-អដ្ឋកថា និដ្ឋិតា.

នមោ តស្ស ភគវតោ អរហតោ សម្មាសម្ពុទ្ធស្ស