១០-១១. អាឃាតបដិវិនយសុត្តាទិវណ្ណនា
៣០-៣១. ទសមេ អាឃាតបដិវិនយាតិ អាឃាតស្ស បដិវិនយការណានិ. តំ កុតេត្ថ លព្ភាតិ ‘‘តំ អនត្ថចរណំ មា អហោសី’’តិ ឯតស្មិំ បុគ្គលេ កុតោ លព្ភា, កេន ការណេន សក្កា លទ្ធុំ, ‘‘បរោ នាម បរស្ស អត្តនោ ចិត្តរុចិយា អនត្ថំ ករោតី’’តិ ឯវំ ចិន្តេត្វា អាឃាតំ បដិវិនេតិ. អថ វា សចាហំ កោបំ ករេយ្យំ, តំ កោបករណំ ឯត្ថ បុគ្គលេ កុតោ លព្ភា, កេន ការណេន លទ្ធព្ពន្តិ អត្ថោ. កុតោ លាភាតិបិ បាឋោ. សចាហំ ឯត្ថ កោបំ ករេយ្យំ, តស្មិំ មេ កោបករណេ កុតោ លាភា លាភា, នាម កេ សិយុន្តិ អត្ថោ. ឥមស្មិញ្ច អត្ថេ តន្តិ និបាតមត្តមេវ ហោតិ. ឯកាទសមេ អនុបុព្ពនិរោធាតិ អនុបដិបាដិនិរោធា. សេសំ សព្ពត្ថ ឧត្តានត្ថមេវាតិ.
សត្តាវាសវគ្គោ តតិយោ.