១-២. អនុបុព្ពវិហារសុត្តាទិវណ្ណនា

៣២-៣៣. ចតុត្ថស្ស បឋមេ អនុបុព្ពវិហារាតិ អនុបដិបាដិយា សមាបជ្ជិតព្ពវិហារា. ទុតិយេ យត្ថ កាមា និរុជ្ឈន្តីតិ យស្មិំ ឋានេ កាមា វូបសម្មន្តិ. និរោធេត្វាតិ អប្បដិវត្តេ កត្វា. និច្ឆាតាតិ តណ្ហាទិដ្ឋិច្ឆាតានំ អភាវេន និច្ឆាតា. និព្ពុតាតិ អត្តបរិតាបនកិលេសានំ អភាវេន និព្ពុតា. តិណ្ណាតិ កាមតោ តិណ្ណា. បារំគតាតិ កាមេ បារំ គតា. តទង្គេនាតិ តេន ឈានង្គេន. ឯត្ថ កាមា និរុជ្ឈន្តីតិ ឯត្ថ បឋមជ្ឈានេ កាមា និរុជ្ឈន្តិ. តេ ចាតិ យេ បឋមជ្ឈានំ សមាបជ្ជន្តិ, តេ កាមេ និរោធេត្វា និរោធេត្វា វិហរន្តិ នាម. បញ្ជលិកោតិ បគ្គហិតអញ្ជលិកោ ហុត្វា. បយិរុបាសេយ្យាតិ ឧបដ្ឋាបេយ្យ. ឥមិនា ឧបាយេន សព្ពត្ថ អត្ថោ វេទិតព្ពោ.