៨. សប្បុរិសសុត្តវណ្ណនា

៣៨. អដ្ឋមេ អត្ថាយាតិ អត្ថត្ថាយ. ហិតាយ សុខាយាតិ ហិតត្ថាយ សុខត្ថាយ. បុព្ពបេតានន្តិ បរលោកគតានំ ញាតីនំ. ឥមស្មិំ សុត្តេ អនុប្បន្នេ ពុទ្ធេ ចក្កវត្តិរាជានោ ពោធិសត្តា បច្ចេកពុទ្ធា លព្ភន្តិ, ពុទ្ធកាលេ ពុទ្ធា ចេវ ពុទ្ធសាវកា ច. យថាវុត្តានញ្ហិ ឯតេសំ អត្ថាយ ហិតាយ សុខាយ សំវត្តន្តិ. ពហុន្នំ វត អត្ថាយ, សប្បញ្ញោ ឃរមាវសន្តិ សប្បញ្ញោ ឃរេ វសន្តោ ពហូនំ វត អត្ថាយ ហោតិ. បុព្ពេតិ បឋមេវ. បុព្ពេកតមនុស្សរន្តិ មាតាបិតូនំ បុព្ពការគុណេ អនុស្សរន្តោ. សហធម្មេនាតិ សការណេន បច្ចយបូជនេន បូជេតិ. អបចេ ព្រហ្មចារយោតិ ព្រហ្មចារិនោ អបចយតិ, នីចវុត្តិតំ នេសំ អាបជ្ជតិ. បេសលោតិ បិយសីលោ.