៥. ទានូបបត្តិសុត្តវណ្ណនា

៣៥. បញ្ចមេ ទានូបបត្តិយោតិ ទានបច្ចយា ឧបបត្តិយោ. ទហតីតិ ឋបេតិ. អធិដ្ឋាតីតិ តស្សេវ វេវចនំ. ភាវេតីតិ វឌ្ឍេតិ. ហីនេ វិមុត្តន្តិ ហីនេសុ បញ្ចសុ កាមគុណេសុ វិមុត្តំ. ឧត្តរិ អភាវិតន្តិ តតោ ឧត្តរិមគ្គផលត្ថាយ អភាវិតំ. តត្រូបបត្តិយា សំវត្តតីតិ យំ ឋានំ បត្ថេត្វា កុសលំ កតំ, តត្ថ និព្ពត្តនត្ថាយ សំវត្តតិ. វីតរាគស្សាតិ មគ្គេន វា សមុច្ឆិន្នរាគស្ស សមាបត្តិយា វា វិក្ខម្ភិតរាគស្ស. ទានមត្តេនេវ ហិ ព្រហ្មលោកេ និព្ពត្តិតុំ ន សក្កា, ទានំ បន សមាធិវិបស្សនាចិត្តស្ស អលង្ការបរិវារំ ហោតិ. តតោ ទានេន មុទុចិត្តោ ព្រហ្មវិហារេ ភាវេត្វា ព្រហ្មលោកេ និព្ពត្តតិ. តេន វុត្តំ – ‘‘វីតរាគស្ស នោ សរាគស្សា’’តិ.