៣. គហបតិវគ្គោ

១. បឋមឧគ្គសុត្តវណ្ណនា

២១. តតិយស្ស បឋមេ បញ្ញត្តេ អាសនេ និសីទីតិ តស្ស កិរ ឃរេ បញ្ចន្នំ ភិក្ខុសតានំ បញ្ច អាសនសតានិ និច្ចំ បញ្ញត្តានេវ ហោន្តិ, តេសុ អញ្ញតរស្មិំ អាសនេ និសីទិ. តំ សុណាហីតិ តេ សុណាហិ, តំ វា អដ្ឋវិធំ អច្ឆរិយធម្មំ សុណាហិ. ចិត្តំ បសីទីតិ ‘‘ពុទ្ធោ នុ ខោ ន ពុទ្ធោ នុ ខោ’’តិ វិតក្កមត្តម្បិ ន ឧប្បជ្ជិ, អយមេវ ពុទ្ធោតិ ចិត្តុប្បាទោ បសន្នោ អនាវិលោ អហោសិ. សកានិ វា ញាតិកុលានីតិ អត្តនោ យាបនមត្តំ ធនំ គហេត្វា ញាតិឃរានិ គច្ឆតុ. កស្ស វោ ទម្មីតិ កតរបុរិសស្ស តុម្ហេ ទទាមិ, អារោចេថ មេ អត្តនោ អធិប្បាយំ. អប្បដិវិភត្តាតិ ‘‘ឯត្តកំ ទស្សាមិ ឯត្តកំ ន ទស្សាមិ, ឥទំ ទស្សាមិ ឥទំ ន ទស្សាមី’’តិ ចិត្តំ ឧប្បាទេន្តេន ហិ បដិវិភត្តា នាម ហោតិ, មយ្ហំ បន ន ឯវំ. អថ ខោ សង្ឃិកា វិយ គណសន្តកា វិយ ច សីលវន្តេហិ សទ្ធិំ សាធារណាយេវ. សក្កច្ចំយេវ បយិរុបាសាមីតិ សហត្ថា ឧបដ្ឋហាមិ, ចិត្តីការេន ឧបសង្កមាមិ.

អនច្ឆរិយំ ខោ បន មំ, ភន្តេតិ, ភន្តេ, យំ មំ ទេវតា ឧបសង្កមិត្វា ឯវំ អារោចេន្តិ, ឥទំ ន អច្ឆរិយំ. យំ បនាហំ តតោនិទានំ ចិត្តស្ស ឧណ្ណតិំ នាភិជានាមិ, តំ ឯវ អច្ឆរិយន្តិ វទតិ. សាធុ សាធុ, ភិក្ខូតិ ឯត្ថ កិញ្ចាបិ ភិក្ខុំ អាមន្តេតិ, ឧបាសកស្សេវ បន វេយ្យាករណសម្បហំសនេ ឯស សាធុការោតិ វេទិតព្ពោ.

២. ទុតិយឧគ្គសុត្តវណ្ណនា

២២. ទុតិយេ នាគវនេតិ តស្ស កិរ សេដ្ឋិនោ នាគវនំ នាម ឧយ្យានំ, សោ តត្ថ បុរេភត្តំ គន្ធមាលាទីនិ គាហាបេត្វា ឧយ្យានកីឡិកំ កីឡិតុកាមោ គន្ត្វា បរិចារិយមានោ ភគវន្តំ អទ្ទស. សហ ទស្សនេនេវស្ស បុរិមនយេនេវ ចិត្តំ បសីទិ, សុរាបានេន ច ឧប្បន្នមន្ទោ តង្ខណំយេវ បហីយិ. តំ សន្ធាយេវមាហ. ឱណោជេសិន្តិ ឧទកំ ហត្ថេ បាតេត្វា អទាសិំ. អសុកោតិ អមុកោ. សមចិត្តោវ ទេមីតិ ‘‘ឥមស្ស ថោកំ, ឥមស្ស ពហុក’’ន្តិ ឯវំ ចិត្តនានត្តំ ន ករោមិ, ទេយ្យធម្មំ បន ឯកសទិសំ ករោមីតិ ទស្សេតិ. អារោចេន្តីតិ អាកាសេ ឋត្វា អារោចេន្តិ. នត្ថិ តំ សំយោជនន្តិ ឥមិនា ឧបាសកោ អត្តនោ អនាគាមិផលំ ព្យាករោតិ.

៣. បឋមហត្ថកសុត្តវណ្ណនា

២៣. តតិយេ ហត្ថកោ អាឡវកោតិ ភគវតា អាឡវកយក្ខស្ស ហត្ថតោ ហត្ថេហិ សម្បដិច្ឆិតត្តា ហត្ថកោតិ លទ្ធនាមោ រាជកុមារោ. សីលវាតិ បញ្ចសីលទសសីលេន សីលវា. ចាគវាតិ ចាគសម្បន្នោ. កច្ចិត្ថ, ភន្តេតិ, ភន្តេ, កច្ចិ ឯត្ថ ភគវតោ ព្យាករណដ្ឋានេ. អប្បិច្ឆោតិ អធិគមប្បិច្ឆតាយ អប្បិច្ឆោ.

៤. ទុតិយហត្ថកសុត្តវណ្ណនា

២៤. ចតុត្ថេ បញ្ចមត្តេហិ ឧបាសកសតេហីតិ សោតាបន្នសកទាគាមីនំយេវ អរិយសាវកឧបាសកានំ បញ្ចហិ សតេហិ បរិវុតោ ភុត្តបាតរាសោ គន្ធមាលវិលេបេនចុណ្ណានិ គហេត្វា យេន ភគវា តេនុបសង្កមិ. សង្គហវត្ថូនីតិ សង្គណ្ហនការណានិ. តេហាហន្តិ តេហិ អហំ. តំ ទានេន សង្គណ្ហាមីតិ នង្គលពលិពទ្ទភត្តពីជាទីនិ ចេវ គន្ធមាលមូលាទីនិ ច ទត្វា សង្គណ្ហាមិ. បេយ្យវជ្ជេនាតិ អម្ម, តាត, ភាតរ, ភគិនីតិអាទិកេន កណ្ណសុខេន មុទុកេន បិយវចនេន សង្គណ្ហាមិ. អត្ថចរិយាយាតិ ‘‘ឥមស្ស ទានេន វា បិយវចនេន វា កិច្ចំ នត្ថិ, អត្ថចរិយាយ សង្គណ្ហិតព្ពយុត្តកោ អយ’’ន្តិ ញត្វា ឧប្បន្នកិច្ចនិត្ថរណសង្ខាតាយ អត្ថចរិយាយ សង្គណ្ហាមិ. សមានត្តតាយាតិ ‘‘ឥមស្ស ទានាទីហិ កិច្ចំ នត្ថិ, សមានត្តតាយ សង្គណ្ហិតព្ពោ អយ’’ន្តិ ឯកតោ ខាទនបិវននិសជ្ជាទីហិ អត្តនា សមានំ កត្វា សង្គណ្ហាមិ. ទលិទ្ទស្ស ខោ នោ តថា សោតព្ពំ មញ្ញន្តីតិ ទលិទ្ទស្ស កិញ្ចិ ទាតុំ វា កាតុំ វា អសក្កោន្តស្ស, យថា ទលិទ្ទស្ស នោ តថា សោតព្ពំ មញ្ញន្តិ, មម បន សោតព្ពំ មញ្ញន្តិ, ទិន្នោវាទេ តិដ្ឋន្តិ, ន មេ អនុសាសនិំ អតិក្កមិតព្ពំ មញ្ញន្តិ. យោនិ ខោ ត្យាយន្តិ ឧបាយោ ខោ តេ អយំ. ឥមេសុ បន ទ្វីសុបិ សុត្តេសុ សត្ថារា សីលចាគបញ្ញា មិស្សកា កថិតាតិ វេទិតព្ពា.

៥-៦. មហានាមសុត្តាទិវណ្ណនា

២៥-២៦. បញ្ចមេ អត្ថូបបរិក្ខិតា ហោតីតិ អត្ថានត្ថំ ការណាការណំ ឧបបរិក្ខិតា ហោតិ. ឆដ្ឋេ សទ្ធាសីលចាគា មិស្សកា កថិតា.

៧. បឋមពលសុត្តវណ្ណនា

២៧. សត្តមេ ឧជ្ឈត្តិពលាតិ ឧជ្ឈានពលា. ពាលានញ្ហិ ‘‘យំ អសុកោ ឥទញ្ចិទញ្ច អាហ, មំ សោ អាហ, ន អញ្ញ’’ន្តិ ឯវំ ឧជ្ឈានមេវ ពលំ. និជ្ឈត្តិពលាតិ ‘‘ន ឥទំ ឯវំ, ឯវំ នាមេត’’ន្តិ អត្ថានត្ថនិជ្ឈាបនំយេវ ពលំ. បដិសង្ខានពលាតិ បច្ចវេក្ខណពលា. ខន្តិពលាតិ អធិវាសនពលា.

៨. ទុតិយពលសុត្តវណ្ណនា

២៨. អដ្ឋមេ ពលានីតិ ញាណពលានិ. អាសវានំ ខយំ បដិជានាតីតិ អរហត្តំ បដិជានាតិ. អនិច្ចតោតិ ហុត្វា អភាវាការេន. យថាភូតន្តិ យថាសភាវតោ. សម្មប្បញ្ញាយាតិ សហវិបស្សនាយ មគ្គបញ្ញាយ. អង្គារកាសូបមាតិ សន្តាបនដ្ឋេន អង្គារកាសុយា ឧបមិតា ឥមេ កាមាតិ. វិវេកនិន្នន្តិ ផលសមាបត្តិវសេន និព្ពាននិន្នំ. វិវេកដ្ឋន្តិ កិលេសេហិ វជ្ជិតំ ទូរីភូតំ វា. នេក្ខម្មាភិរតន្តិ បព្ពជ្ជាភិរតំ. ព្យន្តិភូតន្តិ វិគតន្តភូតំ ឯកទេសេនាបិ អនល្លីនំ វិសំយុត្តំ វិសំសដ្ឋំ. អាសវដ្ឋានិយេហីតិ សម្បយោគវសេន អាសវានំ ការណភូតេហិ, កិលេសធម្មេហីតិ អត្ថោ. អថ វា ព្យន្តិភូតន្តិ វិគតវាយន្តិ អត្ថោ. កុតោ? សព្ពសោ អាសវដ្ឋានិយេហិ ធម្មេហិ, សព្ពេហិ តេភូមកធម្មេហីតិ អត្ថោ. ឥមស្មិំ សុត្តេ អរិយមគ្គោ លោកិយលោកុត្តរោ កថិតោ.

៩. អក្ខណសុត្តវណ្ណនា

២៩. នវមេ ខណេ កិច្ចានិ ករោតីតិ ខណកិច្ចោ, ឱកាសំ លភិត្វាវ កិច្ចានិ ករោតីតិ អត្ថោ. ធម្មោតិ ចតុសច្ចធម្មោ. ឱបសមិកោតិ កិលេសូបសមាវហោ. បរិនិព្ពាយិកោតិ កិលេសបរិនិព្ពានករោ. ចតុមគ្គញាណសង្ខាតំ សម្ពោធិំ គច្ឆតិ សម្បាបុណាតីតិ សម្ពោធគាមី. ទីឃាយុកំ ទេវនិកាយន្តិ ឥទំ អសញ្ញំ ទេវនិកាយំ សន្ធាយ វុត្តំ. អវិញ្ញាតារេសូតិ អតិវិយ អវិញ្ញូសុ.

សុប្បវេទិតេតិ សុកថិតេ. អន្តរាយិកាតិ អន្តរាយករា. ខណោ វេ មា ឧបច្ចគាតិ អយំ លទ្ធោ ខណោ មា អតិក្កមិ. ឥធ ចេវ នំ វិរាធេតីតិ សចេ កោចិ បមត្តចារី ឥធ ឥមំ ខណំ លភិត្វាបិ សទ្ធម្មស្ស និយាមតំ អរិយមគ្គំ វិរាធេតិ ន សម្បាទេតិ. អតីតត្ថោតិ ហាបិតត្ថោ. ចិរត្តំ អនុតបិស្សតីតិ ចិររត្តំ សោចិស្សតិ. យថា ហិ ‘‘អសុកដ្ឋានេ ភណ្ឌំ សមុប្បន្ន’’ន្តិ សុត្វា ឯកោ វាណិជោ ន គច្ឆេយ្យ, អញ្ញេ គន្ត្វា គណ្ហេយ្យុំ, តេសំ តំ អដ្ឋគុណម្បិ ទសគុណម្បិ ភវេយ្យ. អថ ឥតរោ ‘‘មម អត្ថោ អតិក្កន្តោ’’តិ អនុតបេយ្យ, ឯវំ យោ ឥធ ខណំ លភិត្វា អប្បដិបជ្ជន្តោ សទ្ធម្មស្ស និយាមតំ វិរាធេតិ, សោ អយំ វាណិជោវ អតីតត្ថោ ចិរំ អនុតបិស្សតិ សោចិស្សតិ. កិញ្ច ភិយ្យោ អវិជ្ជានិវុតោតិ តថា. បច្ចវិទុន្តិ បដិវិជ្ឈិំសុ. សំវរាតិ សីលសំវរា. មារធេយ្យបរានុគេតិ មារធេយ្យសង្ខាតំ សំសារំ អនុគតេ. បារង្គតាតិ និព្ពានំ គតា. យេ បត្តា អាសវក្ខយន្តិ យេ អរហត្តំ បត្តា. ឯវមិធ គាថាសុ វដ្ដវិវដ្ដំ កថិតំ.

១០. អនុរុទ្ធមហាវិតក្កសុត្តវណ្ណនា

៣០. ទសមេ ចេតីសូតិ ចេតិនាមកានំ រាជូនំ និវាសដ្ឋានត្តា ឯវំលទ្ធវោហារេ រដ្ឋេ. បាចីនវំសទាយេតិ ទសពលស្ស វសនដ្ឋានតោ បាចីនទិសាយ ឋិតេ វំសទាយេ នីលោភាសេហិ វេឡូហិ សញ្ឆន្នេ អរញ្ញេ. ឯវំ ចេតសោ បរិវិតក្កោ ឧទបាទីតិ ថេរោ កិរ បព្ពជិត្វា បឋមអន្តោវស្សម្ហិយេវ សមាបត្តិលាភី ហុត្វា សហស្សលោកធាតុទស្សនសមត្ថំ ទិព្ពចក្ខុញាណំ ឧប្បាទេសិ. សោ សារិបុត្តត្ថេរស្ស សន្តិកំ គន្ត្វា ឯវមាហ – ‘‘ឥធាហំ, អាវុសោ សារិបុត្ត, ទិព្ពេន ចក្ខុនា វិសុទ្ធេន អតិក្កន្តមានុសកេន សហស្សលោកំ ឱលោកេមិ. អារទ្ធំ ខោ បន មេ វីរិយំ អសល្លីនំ, ឧបដ្ឋិតា សតិ អសម្មុដ្ឋា, បស្សទ្ធោ កាយោ អសារទ្ធោ, សមាហិតំ ចិត្តំ ឯកគ្គំ. អថ ច បន មេ អនុបាទាយ អាសវេហិ ចិត្តំ ន វិមុច្ចតី’’តិ. អថ នំ ថេរោ អាហ – ‘‘យំ ខោ តេ, អាវុសោ អនុរុទ្ធ, ឯវំ ហោតិ ‘អហំ ទិព្ពេន ចក្ខុនា…បេ… ឱលោកេមី’តិ, ឥទំ តេ មានស្មិំ. យម្បិ តេ, អាវុសោ, អនុរុទ្ធ ឯវំ ហោតិ ‘អារទ្ធំ ខោ បន មេ វីរិយំ…បេ… ឯកគ្គ’ន្តិ, ឥទំ តេ ឧទ្ធច្ចស្មិំ. យម្បិ តេ, អាវុសោ អនុរុទ្ធ, ឯវំ ហោតិ ‘អថ ច បន មេ អនុបាទាយ អាសវេហិ ចិត្តំ ន វិមុច្ចតី’តិ, ឥទំ តេ កុក្កុច្ចស្មិំ. សាធុ វតាយស្មា អនុរុទ្ធោ ឥមេ តយោ ធម្មេ បហាយ ឥមេ តយោ ធម្មេ អមនសិករិត្វា អមតាយ ធាតុយា ចិត្តំ ឧបសំហរតូ’’តិ ឯវមស្ស ថេរោ កម្មដ្ឋានំ កថេសិ. សោ កម្មដ្ឋានំ គហេត្វា សត្ថារំ អាបុច្ឆិត្វា ចេតិរដ្ឋំ គន្ត្វា សមណធម្មំ ករោន្តោ អដ្ឋមាសំ ចង្កមេន វីតិនាមេសិ. សោ បធានវេគនិម្មថិតត្តា កិលន្តកាយោ ឯកស្ស វេឡុគុម្ពស្ស ហេដ្ឋា និសីទិ. អថស្សាយំ ឯវំ ចេតសោ បរិវិតក្កោ ឧទបាទិ, ឯស មហាបុរិសវិតក្កោ ឧប្បជ្ជីតិ អត្ថោ.

អប្បិច្ឆស្សាតិ ឯត្ថ បច្ចយប្បិច្ឆោ, អធិគមប្បិច្ឆោ, បរិយត្តិអប្បិច្ឆោ, ធុតង្គប្បិច្ឆោតិ ចត្តារោ អប្បិច្ឆា. តត្ថ បច្ចយប្បិច្ឆោ ពហុំ ទេន្តេ អប្បំ គណ្ហាតិ, អប្បំ ទេន្តេ អប្បតរំ គណ្ហាតិ, ន អនវសេសគ្គាហី ហោតិ. អធិគមប្បិច្ឆោ មជ្ឈន្តិកត្ថេរោ វិយ អត្តនោ អធិគមំ អញ្ញេសំ ជានិតុំ ន ទេតិ. បរិយត្តិអប្បិច្ឆោ តេបិដកោបិ សមានោ ន ពហុស្សុតភាវំ ជានាបេតុកាមោ ហោតិ សាកេតតិស្សត្ថេរោ វិយ. ធុតង្គប្បិច្ឆោ ធុតង្គបរិហរណភាវំ អញ្ញេសំ ជានិតុំ ន ទេតិ ទ្វេភាតិកត្ថេរេសុ ជេដ្ឋត្ថេរោ វិយ. វត្ថុ វិសុទ្ធិមគ្គេ កថិតំ. អយំ ធម្មោតិ ឯវំ សន្តគុណនិគុហនេន ច បដិគ្គហណេ មត្តញ្ញុតាយ ច អប្បិច្ឆស្ស បុគ្គលស្ស អយំ នវលោកុត្តរធម្មោ សម្បជ្ជតិ, នោ មហិច្ឆស្ស. ឯវំ សព្ពត្ថ យោជេតព្ពំ.

សន្តុដ្ឋស្សាតិ ចតូសុ បច្ចយេសុ តីហិ សន្តោសេហិ សន្តុដ្ឋស្ស. បវិវិត្តស្សាតិ កាយចិត្តឧបធិវិវេកេហិ វិវិត្តស្ស. តត្ថ កាយវិវេកោ នាម គណសង្គណិកំ វិនោទេត្វា អារម្ភវត្ថុវសេន ឯកីភាវោ. ឯកីភាវមត្តេនេវ កម្មំ ន និប្ផជ្ជតីតិ កសិណបរិកម្មំ កត្វា អដ្ឋ សមាបត្តិយោ និព្ពត្តេតិ, អយំ ចិត្តវិវេកោ នាម. សមាបត្តិមត្តេនេវ កម្មំ ន និប្ផជ្ជតីតិ ឈានំ បាទកំ កត្វា សង្ខារេ សម្មសិត្វា សហ បដិសម្ភិទាហិ អរហត្តំ បាបុណាតិ, អយំ សព្ពាការតោ ឧបធិវិវេកោ នាម. តេនាហ ភគវា – ‘‘កាយវិវេកោ ច វិវេកដ្ឋកាយានំ នេក្ខម្មាភិរតានំ, ចិត្តវិវេកោ ច បរិសុទ្ធចិត្តានំ បរមវោទានប្បត្តានំ, ឧបធិវិវេកោ ច និរុបធីនំ បុគ្គលានំ វិសង្ខារគតាន’’ន្តិ (មហានិ. ៧, ៤៩).

សង្គណិការាមស្សាតិ គណសង្គណិកាយ ចេវ កិលេសសង្គណិកាយ ច រតស្ស. អារទ្ធវីរិយស្សាតិ កាយិកចេតសិកវីរិយវសេន អារទ្ធវីរិយស្ស. ឧបដ្ឋិតស្សតិស្សាតិ ចតុសតិបដ្ឋានវសេន ឧបដ្ឋិតស្សតិស្ស. សមាហិតស្សាតិ ឯកគ្គចិត្តស្ស. បញ្ញវតោតិ កម្មស្សកតបញ្ញាយ បញ្ញវតោ.

សាធុ សាធូតិ ថេរស្ស វិតក្កំ សម្បហំសេន្តោ ឯវមាហ. ឥមំ អដ្ឋមន្តិ សត្ត និធី លទ្ធបុរិសស្ស អដ្ឋមំ ទេន្តោ វិយ, សត្ត មណិរតនានិ, សត្ត ហត្ថិរតនានិ, សត្ត អស្សរតនានិ លទ្ធបុរិសស្ស អដ្ឋមំ ទេន្តោ វិយ សត្ត មហាបុរិសវិតក្កេ វិតក្កេត្វា ឋិតស្ស អដ្ឋមំ អាចិក្ខន្តោ ឯវមាហ. និប្បបញ្ចារាមស្សាតិ តណ្ហាមានទិដ្ឋិបបញ្ចរហិតត្តា និប្បបញ្ចសង្ខាតេ និព្ពានបទេ អភិរតស្ស. ឥតរំ តស្សេវ វេវចនំ. បបញ្ចារាមស្សាតិ យថាវុត្តេសុ បបញ្ចេសុ អភិរតស្ស. ឥតរំ តស្សេវ វេវចនំ.

យតោតិ យទា. តតោតិ តទា. នានារត្តានន្តិ និលបីតលោហិតោទាតវណ្ណេហិ នានារជនេហិ រត្តានំ. បំសុកូលន្តិ តេវីសតិយា ខេត្តេសុ ឋិតបំសុកូលចីវរំ. ខាយិស្សតីតិ យថា តស្ស បុព្ពណ្ហសមយាទីសុ យស្មិំ សមយេ យំ ឥច្ឆតិ, តស្មិំ សមយេ តំ បារុបន្តស្ស សោ ទុស្សករណ្ឌកោ មនាបោ ហុត្វា ខាយតិ, ឯវំ តុយ្ហម្បិ ចីវរសន្តោសមហាអរិយវំសេន តុដ្ឋស្ស វិហរតោ បំសុកូលចីវរំ ខាយិស្សតិ ឧបដ្ឋហិស្សតិ. រតិយាតិ រតិអត្ថាយ. អបរិតស្សាយាតិ តណ្ហាទិដ្ឋិបរិតស្សនាហិ អបរិតស្សនត្ថាយ. ផាសុវិហារាយាតិ សុខវិហារត្ថាយ. ឱក្កមនាយ និព្ពានស្សាតិ អមតំ និព្ពានំ ឱតរណត្ថាយ.

បិណ្ឌិយាលោបភោជនន្តិ គាមនិគមរាជធានីសុ ជង្ឃាពលំ និស្សាយ ឃរបដិបាដិយា ចរន្តេន លទ្ធបិណ្ឌិយាលោបភោជនំ. ខាយិស្សតីតិ តស្ស គហបតិនោ នានគ្គរសភោជនំ វិយ ឧបដ្ឋហិស្សតិ. សន្តុដ្ឋស្ស វិហរតោតិ បិណ្ឌបាតសន្តោសមហាអរិយវំសេន សន្តុដ្ឋស្ស វិហរតោ. រុក្ខមូលសេនាសនំ ខាយិស្សតីតិ តស្ស គហបតិនោ តេភូមកបាសាទេ គន្ធកុសុមវាសសុគន្ធំ កូដាគារំ វិយ រុក្ខមូលំ ឧបដ្ឋហិស្សតិ. សន្តុដ្ឋស្សាតិ សេនាសនសន្តោសមហាអរិយវំសេន សន្តុដ្ឋស្ស. តិណសន្ថារកោតិ តិណេហិ វា បណ្ណេហិ វា ភូមិយំ វា ផលកបាសាណតលានិ វា អញ្ញតរស្មិំ សន្ថតសន្ថតោ. បូតិមុត្តន្តិ យំកិញ្ចិ មុត្តំ. តង្ខណេ គហិតម្បិ បូតិមុត្តមេវ វុច្ចតិ ទុគ្គន្ធត្តា. សន្តុដ្ឋស្ស វិហរតោតិ គិលានបច្ចយភេសជ្ជបរិក្ខារសន្តោសេន សន្តុដ្ឋស្ស វិហរតោ.

ឥតិ ភគវា ចតូសុ ឋានេសុ អរហត្តំ បក្ខិបន្តោ កម្មដ្ឋានំ កថេត្វា ‘‘កតរសេនាសនេ នុ ខោ វសន្តស្ស កម្មដ្ឋានំ សប្បាយំ ភវិស្សតី’’តិ អាវជ្ជេន្តោ ‘‘តស្មិញ្ញេវ វសន្តស្សា’’តិ ញត្វា តេន ហិ ត្វំ, អនុរុទ្ធាតិអាទិមាហ. បវិវិត្តស្ស វិហរតោតិ តីហិ វិវេកេហិ វិវិត្តស្ស វិហរន្តស្ស. ឧយ្យោជនិកបដិសំយុត្តន្តិ ឧយ្យោជនិកេហេវ វចនេហិ បដិសំយុត្តំ, តេសំ ឧបដ្ឋានគមនកំយេវាតិ អត្ថោ. បបញ្ចនិរោធេតិ និព្ពានបទេ. បក្ខន្ទតីតិ អារម្មណករណវសេន បក្ខន្ទតិ. បសីទតីតិអាទីសុបិ អារម្មណវសេនេវ បសីទនសន្តិដ្ឋនមុច្ចនា វេទិតព្ពា. ឥតិ ភគវា ចេតិរដ្ឋេ បាចីនវំសទាយេ អាយស្មតោ អនុរុទ្ធស្ស កថិតេ អដ្ឋ មហាបុរិសវិតក្កេ បុន ភេសកឡាវនមហាវិហារេ និសីទិត្វា ភិក្ខុសង្ឃស្ស វិត្ថារេន កថេសិ.

មនោមយេនាតិ មនេន និព្ពត្តិតកាយោបិ មនោមយោតិ វុច្ចតិ មនេន គតកាយោបិ, ឥធ មនេន គតកាយំ សន្ធាយេវមាហ. យថា មេ អហុ សង្កប្បោតិ យថា មយ្ហំ វិតក្កោ អហោសិ, តតោ ឧត្តរិ អដ្ឋមំ មហាបុរិសវិតក្កំ ទស្សេន្តោ តតោ ឧត្តរិំ ទេសយិ. សេសំ សព្ពត្ថ ឧត្តានមេវាតិ.

គហបតិវគ្គោ តតិយោ.