៥. មលសុត្តវណ្ណនា

១៥. បញ្ចមេ អសជ្ឈាយមលាតិ ឧគ្គហិតមន្តានំ អសជ្ឈាយករណំ មលំ នាម ហោតិ. អនុដ្ឋានមលា ឃរាតិ ឧដ្ឋានវីរិយាភាវោ ឃរានំ មលំ នាម. វណ្ណស្សាតិ សរីរវណ្ណស្ស. រក្ខតោតិ យំកិញ្ចិ អត្តនោ សន្តកំ រក្ខន្តស្ស. អវិជ្ជា បរមំ មលន្តិ តតោ សេសាកុសលធម្មមលតោ អដ្ឋសុ ឋានេសុ អញ្ញាណភូតា វដ្ដមូលសង្ខាតា ពហលន្ធការអវិជ្ជា បរមំ មលំ. តតោ ហិ មលតរំ នាម នត្ថិ. ឥមស្មិម្បិ សុត្តេ វដ្ដមេវ កថិតំ.