៦. ទូតេយ្យសុត្តវណ្ណនា

១៦. ឆដ្ឋេ ទូតេយ្យន្តិ ទូតកម្មំ. គន្តុមរហតីតិ តំ ទូតេយ្យសង្ខាតំ សាសនំ ធារេត្វា ហរិតុំ អរហតិ. សោតាតិ យោ តំ អស្ស សាសនំ ទេតិ, តស្ស សោតា. សាវេតាតិ តំ ឧគ្គណ្ហិត្វា ‘‘ឥទំ នាម តុម្ហេហិ វុត្ត’’ន្តិ បដិសាវេតា. ឧគ្គហេតាតិ សុគ្គហិតំ កត្វា ឧគ្គហេតា. ធារេតាតិ សុធារិតំ កត្វា ធារេតា. វិញ្ញាតិ អត្ថានត្ថស្ស អត្ថំ ជានិតា. វិញ្ញាបេតាតិ បរំ វិជានាបេតា. សហិតា សហិតស្សាតិ ឥទំ សហិតំ, ឥទំ អសហិតន្តិ ឯវំ សហិតាសហិតស្ស កុសលោ, ឧបគតានុបគតេសុ ឆេកោ សាសនំ អារោចេន្តោ សហិតំ សល្លក្ខេត្វា អារោចេតិ. ន ព្យថតីតិ វេធតិ ន ឆម្ភតិ. អសន្ទិទ្ធន្តិ និស្សន្ទេហំ វិគតសំសយំ. បុច្ឆិតោតិ បញ្ហត្ថាយ បុច្ឆិតោ.