១០. ឧបោសថសុត្តវណ្ណនា

២០. ទសមេ និសិន្នោ ហោតីតិ ឧបោសថករណត្ថាយ ឧបាសិកាយ រតនបាសាទេ និសិន្នោ. និសជ្ជ បន ភិក្ខូនំ ចិត្តានិ ឱលោកេន្តោ ឯកំ ទុស្សីលបុគ្គលំ ទិស្វា ‘‘សចាហំ ឥមស្មិំ បុគ្គលេ និសិន្នេយេវ បាតិមោក្ខំ ឧទ្ទិសិស្សាមិ, សត្តធា តស្ស មុទ្ធា ផលិស្សតី’’តិ តស្ស អនុកម្បាយ តុណ្ហីយេវ អហោសិ. អភិក្កន្តាតិ អតិក្កន្តា បរិក្ខីណា. ឧទ្ធស្តេ អរុណេតិ ឧគ្គតេ អរុណសីសេ. នន្ទិមុខិយាតិ តុដ្ឋមុខិយា. អបរិសុទ្ធា, អានន្ទ, បរិសាតិ ‘‘អសុកបុគ្គលោ អបរិសុទ្ធោ’’តិ អវត្វា ‘‘អបរិសុទ្ធា, អានន្ទ, បរិសា’’តិ អាហ. សេសំ សព្ពត្ថ ឧត្តានមេវាតិ.

មហាវគ្គោ ទុតិយោ.