៩. នន្ទសុត្តវណ្ណនា

៩. នវមេ កុលបុត្តោតិ ជាតិកុលបុត្តោ. ពលវាតិ ថាមសម្បន្នោ. បាសាទិកោតិ រូបសម្បត្តិយា បសាទជនកោ. តិព្ពរាគោតិ ពហលរាគោ. កិមញ្ញត្រាតិអាទីសុ អយមត្ថោ – កិំ អញ្ញេន ការណេន កថិតេន, អយំ នន្ទោ ឥន្ទ្រិយេសុ គុត្តទ្វារោ ភោជនេ មត្តញ្ញូ ជាគរិយមនុយុត្តោ សតិសម្បជញ្ញេន សមន្នាគតោ, យេហិ នន្ទោ សក្កោតិ បរិបុណ្ណំ បរិសុទ្ធំ ព្រហ្មចរិយំ ចរិតុំ. សចេ ឥមេហិ ការណេហិ សមន្នាគតោ នាភវិស្ស, ន សក្កុណេយ្យាតិ. ឥតិហ តត្ថាតិ ឯវំ តត្ថ. ឥមស្មិំ សុត្តេ វដ្ដមេវ កថិតំ.