១០. ការណ្ឌវសុត្តវណ្ណនា

១០. ទសមេ អញ្ញេនាញ្ញំ បដិចរតីតិ អញ្ញេន ការណេន វចនេន វា អញ្ញំ ការណំ វចនំ វា បដិច្ឆាទេតិ. ពហិទ្ធា កថំ អបនាមេតីតិ ពាហិរតោ អញ្ញំ អាគន្តុកកថំ ឱតារេតិ. អបនេយ្យេសោតិ អបនេយ្យោ នីហរិតព្ពោ ឯស. សមណទូសីតិ សមណទូសកោ. សមណបលាបោតិ វីហីសុ វីហិបលាបោ វិយ និស្សារតាយ សមណេសុ សមណបលាបោ. សមណការណ្ឌវោតិ សមណកចវរោ. ពហិទ្ធា នាសេន្តីតិ ពហិ នីហរន្តិ. យវករណេតិ យវខេត្តេ. ផុណមានស្សាតិ ឧច្ចេ ឋានេ ឋត្វា មហាវាតេ ឱបុនិយមានស្ស. អបសម្មជ្ជន្តីតិ សារធញ្ញានំ ឯកតោ ទុព្ពលធញ្ញានំ ឯកតោ ករណត្ថំ បុនប្បុនំ អបសម្មជ្ជន្តិ, អបសម្មជ្ជនិសង្ខាតេន វាតគ្គាហិនា សុប្បេន វា វត្ថេន វា នីហរន្តិ. ទទ្ទរន្តិ ទទ្ទរសទ្ទំ.

សំវាសាយន្តិ សំវាសេន អយំ. វិជានាថាតិ ជានេយ្យាថ. សន្តវាចោតិ សណ្ហវាចោ. ជនវតីតិ ជនមជ្ឈេ. រហោ ករោតិ ករណន្តិ ករណំ វុច្ចតិ បាបកម្មំ, តំ រហោ បដិច្ឆន្នោ ហុត្វា ករោតិ. សំសប្បី ច មុសាវាទីតិ សំសប្បិត្វា មុសាវាទី, មុសា ភណន្តោ សំសប្បតិ ផន្ទតីតិ អត្ថោ. ឥមស្មិំ សុត្តេ វដ្ដមេវ កថេត្វា គាថាសុ វដ្ដវិវដ្ដំ កថិតន្តិ.

មេត្តាវគ្គោ បឋមោ.