៩. សត្ថុសាសនសុត្តវណ្ណនា

៨៣. នវមេ ឯកោតិ អទុតិយោ. វូបកដ្ឋោតិ កាយេន គណតោ, ចិត្តេន កិលេសេហិ វូបកដ្ឋោ វិវេកដ្ឋោ ទូរីភូតោ. អប្បមត្តោតិ សតិអវិប្បវាសេ ឋិតោ. បហិតត្តោតិ បេសិតត្តោ. និព្ពិទាយាតិ វដ្ដេ ឧក្កណ្ឋនត្ថាយ. វិរាគាយាតិ រាគាទីនំ វិរជ្ជនត្ថាយ. និរោធាយាតិ អប្បវត្តិករណត្ថាយ. វូបសមាយាតិ កិលេសវូបសមាយ អប្បវត្តិយា. អភិញ្ញាយាតិ តិលក្ខណំ អារោបេត្វា អភិជាននត្ថាយ. សម្ពោធាយាតិ មគ្គសង្ខាតស្ស សម្ពោធស្ស អត្ថាយ. និព្ពានាយាតិ និព្ពានស្ស សច្ឆិករណត្ថាយ.