៨. វិនយវគ្គោ

១. បឋមវិនយធរសុត្តវណ្ណនា

៧៥. អដ្ឋមស្ស បឋមេ អាបត្តិំ ជានាតីតិ អាបត្តិំយេវ អាបត្តីតិ ជានាតិ. សេសបទេសុបិ ឯសេវ នយោ.

២. ទុតិយវិនយធរសុត្តវណ្ណនា

៧៦. ទុតិយេ ស្វាគតានីតិ សុអាគតានិ សុប្បគុណានិ. សុវិភត្តានីតិ កោដ្ឋាសតោ សុដ្ឋុ វិភត្តានិ. សុប្បវត្តីនីតិ អាវជ្ជិតាវជ្ជិតដ្ឋានេ សុដ្ឋុ បវត្តានិ ទឡ្ហប្បគុណានិ. សុវិនិច្ឆិតានីតិ សុដ្ឋុ វិនិច្ឆិតានិ. សុត្តសោតិ វិភង្គតោ. អនុព្យញ្ជនសោតិ ខន្ធកបរិវារតោ.

៣. តតិយវិនយធរសុត្តវណ្ណនា

៧៧. តតិយេ វិនយេ ខោ បន ឋិតោ ហោតីតិ វិនយលក្ខណេ បតិដ្ឋិតោ ហោតិ. អសំហីរោតិ ន សក្កា ហោតិ គហិតគ្គហណំ វិស្សជ្ជាបេតុំ.

៩. សត្ថុសាសនសុត្តវណ្ណនា

៨៣. នវមេ ឯកោតិ អទុតិយោ. វូបកដ្ឋោតិ កាយេន គណតោ, ចិត្តេន កិលេសេហិ វូបកដ្ឋោ វិវេកដ្ឋោ ទូរីភូតោ. អប្បមត្តោតិ សតិអវិប្បវាសេ ឋិតោ. បហិតត្តោតិ បេសិតត្តោ. និព្ពិទាយាតិ វដ្ដេ ឧក្កណ្ឋនត្ថាយ. វិរាគាយាតិ រាគាទីនំ វិរជ្ជនត្ថាយ. និរោធាយាតិ អប្បវត្តិករណត្ថាយ. វូបសមាយាតិ កិលេសវូបសមាយ អប្បវត្តិយា. អភិញ្ញាយាតិ តិលក្ខណំ អារោបេត្វា អភិជាននត្ថាយ. សម្ពោធាយាតិ មគ្គសង្ខាតស្ស សម្ពោធស្ស អត្ថាយ. និព្ពានាយាតិ និព្ពានស្ស សច្ឆិករណត្ថាយ.

១០. អធិករណសមថសុត្តវណ្ណនា

៨៤. ទសមេ អធិករណានិ សមេន្តិ វូបសមេន្តីតិ អធិករណសមថា. ឧប្បន្នុប្បន្នានន្តិ ឧប្បន្នានំ ឧប្បន្នានំ. អធិករណានន្តិ វិវាទាធិករណំ អនុវាទាធិករណំ អាបត្តាធិករណំ កិច្ចាធិករណន្តិ ឥមេសំ ចតុន្នំ. សមថាយ វូបសមាយាតិ សមថត្ថញ្ចេវ វូបសមនត្ថញ្ច. សម្មុខាវិនយោ ទាតព្ពោ…បេ… តិណវត្ថារកោតិ ឥមេ សត្ត សមថា ទាតព្ពា. តេសំ វិនិច្ឆយោ វិនយសំវណ្ណនតោ (ចូឡវ. អដ្ឋ. ១៨៦-១៨៧ អាទយោ) គហេតព្ពោ. អបិច ទីឃនិកាយេ សង្គីតិសុត្តវណ្ណនាយម្បិ (ទី. និ. អដ្ឋ. ៣.៣៣១ អធិករណសមថសត្តកវណ្ណនា) វិត្ថារិតោយេវ, តថា មជ្ឈិមនិកាយេ សាមគាមសុត្តវណ្ណនាយាតិ (ម. និ. អដ្ឋ. ៣.៤៦).

វិនយវគ្គោ អដ្ឋមោ.