១. អព្យាកតសុត្តវណ្ណនា

៥៤. ឆដ្ឋវគ្គស្ស បឋមេ អព្យាកតវត្ថូសូតិ ឯកំសាទិវសេន អកថិតវត្ថូសុ. តថាគតោតិ សត្តោ. ទិដ្ឋិគតមេតន្តិ មិច្ឆាទិដ្ឋិមត្តកមេតំ, ន តាយ ទិដ្ឋិយា គហិតសត្តោ នាម អត្ថិ. បដិបទន្តិ អរិយមគ្គំ. ន ឆម្ភតីតិ ទិដ្ឋិវសេន ន កម្បតិ. សេសបទេសុបិ ឯសេវ នយោ. តណ្ហាគតន្តិ ទិដ្ឋិតណ្ហា. សញ្ញាគតាទីសុបិ ឯសេវ នយោ. ទិដ្ឋិសញ្ញា ឯវ ហេត្ថ សញ្ញាគតំ, ទិដ្ឋិនិស្សិតមានោយេវ ទិដ្ឋិមញ្ញិតមេវ វា មញ្ញិតំ, ទិដ្ឋិបបញ្ចោវ បបញ្ចិតំ, ទិដ្ឋុបាទានមេវ ឧបាទានំ, ទិដ្ឋិយា វិរូបំ បដិសរណភាវោយេវ វិប្បដិសារោ នាមាតិ វេទិតព្ពោ. ឯត្ថ ច ទិដ្ឋិគ្គហណេន ទ្វាសដ្ឋិ ទិដ្ឋិយោ, ទិដ្ឋិនិរោធគាមិនិបដិបទាគហណេន សោតាបត្តិមគ្គោ គហិតោតិ.