៣. បឋមអគ្គិសុត្តវណ្ណនា

៤៦. តតិយេ សព្ពេបិ រាគាទយោ អនុឌហនដ្ឋេន អគ្គី. អាហុនេយ្យគ្គីតិអាទីសុ បនេត្ថ អាហុនំ វុច្ចតិ សក្ការោ, អាហុនំ អរហន្តីតិ អាហុនេយ្យា. មាតាបិតរោ ហិ បុត្តានំ ពហុបការត្តា អាហុនំ អរហន្តិ, តេសុ វិប្បដិបជ្ជមានា បុត្តា និរយាទីសុ និព្ពត្តន្តិ. តស្មា កិញ្ចាបិ មាតាបិតរោ ន អនុឌហន្តិ, អនុឌហនស្ស បន បច្ចយា ហោន្តិ. ឥតិ អនុឌហនដ្ឋេនេវ អាហុនេយ្យគ្គីតិ វុច្ចន្តិ. គហបតីតិ បន គេហសាមិកោ វុច្ចតិ, សោ មាតុគាមស្ស សយនវត្ថាលង្ការាទិអនុប្បទានេន ពហុបការោ. តំ អតិចរន្តោ មាតុគាមោ និរយាទីសុ និព្ពត្តតិ. តស្មា សោបិ បុរិមនយេនេវ អនុឌហនដ្ឋេន គហបតគ្គីតិ វុត្តោ. ទក្ខិណេយ្យគ្គីតិ ឯត្ថ បន ទក្ខិណាតិ ចត្តារោ បច្ចយា, ភិក្ខុសង្ឃោ ទក្ខិណេយ្យោ. សោ ហិ គិហីនំ តីសុ សរណេសុ បញ្ចសុ សីលេសុ ទសសុ សីលេសុ មាតាបិតុបដ្ឋានេ ធម្មិកសមណព្រាហ្មណុបដ្ឋានេតិ ឯវមាទីសុ កល្យាណធម្មេសុ និយោជនេន ពហុបការោ. តស្មិំ មិច្ឆាបដិបន្នា គិហី ភិក្ខុសង្ឃំ អក្កោសិត្វា បរិភាសិត្វា និរយាទីសុ និព្ពត្តន្តិ. តស្មា សោបិ បុរិមនយេនេវ អនុឌហនដ្ឋេន ទក្ខិណេយ្យគ្គីតិ វុត្តោ. កដ្ឋតោ និព្ពត្តោ បាកតិកោវ អគ្គិ កដ្ឋគ្គិ នាម.