៨. ទុតិយសមយសុត្តវណ្ណនា

២៨. អដ្ឋមេ មណ្ឌលមាឡេតិ ភោជនសាលាយ. ចារិត្តកិលមថោតិ បិណ្ឌបាតចរិយាយ ឧប្បន្នកិលមថោ. ភត្តកិលមថោតិ ភត្តទរថោ. វិហារបច្ឆាយាយន្តិ វិហារបច្ចន្តេ ឆាយាយ. យទេវស្ស ទិវា សមាធិនិមិត្តំ មនសិកតំ ហោតីតិ យំ ឯវ តស្ស តតោ បុរិមទិវសភាគេ សមថនិមិត្តំ ចិត្តេ កតំ ហោតិ. តទេវស្ស តស្មិំ សមយេ សមុទាចរតីតិ តំយេវ ឯតស្ស តស្មិំ សមយេ ទិវាវិហារេ និសិន្នស្ស មនោទ្វារេ សញ្ចរតិ. ឱជដ្ឋាយីតិ ឱជាយ ឋិតោ បតិដ្ឋិតោ. ផាសុកស្ស ហោតីតិ ផាសុកំ អស្ស ហោតិ. សម្មុខាតិ កថេន្តស្ស សម្មុខដ្ឋានេ. សុតន្តិ សោតេន សុតំ. បដិគ្គហិតន្តិ ចិត្តេន បដិគ្គហិតំ.