៨-៩. អនុត្តរិយសុត្តាទិវណ្ណនា

៨-៩. អដ្ឋមេ អនុត្តរិយានីតិ អញ្ញេន ឧត្តរិតរេន រហិតានិ និរុត្តរានិ. ទស្សនានុត្តរិយន្តិ រូបទស្សនេសុ អនុត្តរំ. ឯស នយោ សព្ពបទេសុ. ហត្ថិរតនាទីនញ្ហិ ទស្សនំ ន ទស្សនានុត្តរិយំ, និវិដ្ឋសទ្ធស្ស បន និវិដ្ឋបេមវសេន ទសពលស្ស វា ភិក្ខុសង្ឃស្ស វា កសិណអសុភនិមិត្តាទីនំ វា អញ្ញតរស្ស ទស្សនំ ទស្សនានុត្តរិយំ នាម. ខត្តិយាទីនំ គុណកថាសវនំ ន សវនានុត្តរិយំ, និវិដ្ឋសទ្ធស្ស បន និវិដ្ឋបេមវសេន តិណ្ណំ វា រតនានំ គុណកថាសវនំ តេបិដកពុទ្ធវចនសវនំ វា សវនានុត្តរិយំ នាម. មណិរតនាទីនំ លាភោ ន លាភានុត្តរិយំ, សត្តវិធអរិយធនលាភោ បន លាភានុត្តរិយំ នាម. ហត្ថិសិប្បាទិសិក្ខនំ ន សិក្ខានុត្តរិយំ, សិក្ខាត្តយស្ស បូរណំ បន សិក្ខានុត្តរិយំ នាម. ខត្តិយាទីនំ បារិចរិយា ន បារិចរិយានុត្តរិយំ, តិណ្ណំ បន រតនានំ បារិចរិយា បារិចរិយានុត្តរិយំ នាម. ខត្តិយាទីនំ គុណានុស្សរណំ ន អនុស្សតានុត្តរិយំ, តិណ្ណំ បន រតនានំ គុណានុស្សរណំ អនុស្សតានុត្តរិយំ នាម. ឥតិ ឥមានិ ឆ អនុត្តរិយានិ លោកិយលោកុត្តរានិ កថិតានិ. នវមេ ពុទ្ធានុស្សតីតិ ពុទ្ធគុណារម្មណា សតិ. សេសបទេសុបិ ឯសេវ នយោ.